Macron: Evropa përballet me kërcënimin më të madh që nga Lufta e Dytë Botërore

Presidenti francez Emmanuel Macron ka përshkruar planet për një rritje të madhe të shpenzimeve për mbrojtjen, duke paralajmëruar se liria e Evropës po përballet me një “kërcënim më të madh” se në çdo kohë që nga fundi i Luftës së Dytë Botërore.

Në një fjalim para forcave të armatosura në Paris, ai tha se “po jetojmë në një moment vendimtar” për shkak të gjeopolitikës komplekse.

Macron bëri thirrje që shpenzimet e mbrojtjes së Francës të rriten me 3.5 miliardë euro vitin e ardhshëm dhe më pas me 3 miliardë euro të tjera në vitin 2027.

Duke iu referuar kërcënimit nga Rusia, ai denoncoi “politikat imperialiste” dhe “fuqitë aneksuese”.

Ndër tjera, presidenti francez u zotua të dyfishojë buxhetin ushtarak të Francës deri në vitin 2027, tre vjet më herët se sa ishte planifikuar fillimisht, shkruan BBC.

Në vitin 2017, buxheti i mbrojtjes i vendit të tij ishte 32 miliardë euro dhe sipas planeve do të rritej në 64 miliardë euro brenda dy vjetësh.

Por, propozimet ende duhet të miratohen nga qeveria franceze.

“Për të qenë i lirë në këtë botë, duhet të të kenë frikë. Për të të kenë frikë, duhet të jesh i fuqishëm”, tha ai.

Macron tha se bota po dëshmonte rikthimin e energjisë bërthamore dhe “përhapjen e konflikteve të mëdha”.

Ai gjithashtu iu referua bombardimeve amerikane të Iranit, luftimeve midis Indisë dhe Pakistanit dhe asaj që ai e quajti “ngritje dhe ulje në mbështetjen amerikane për Ukrainën”.

Ndryshe, muajin e kaluar, anëtarët e NATO-s ranë dakord të angazhohen për të shpenzuar 5% të GDP-së çdo vit për mbrojtje, nga objektivi i mëparshëm prej 2%.

Mbretëria e Bashkuar njoftoi gjithashtu rishikimin e saj të mbrojtjes, me Sekretarin e Mbrojtjes John Healey që tha se do t’i dërgonte një “mesazh Moskës”.

Së fundmi, kreu i ushtrisë franceze Thierry Burkhard tha se Rusia e shihte Francën si “armikun e saj kryesor në Evropë”.