Një tifoz i Galatasaray kërcënon

Zëvendëspresidenti Napolit, Edoardo De Laurentiis, ka marrë kërcënime për vdekje nga një tifoz i Galatasarayt, sipas raportimeve të fundit. 

Sipas gazetarit turk Samet Cayir, një person që pretendon se është anëtar i mafias turke, ka dërguar mesazhe kërcënuese përmes WhatsApp-it, duke e paralajmëruar De Laurentiisin që të lejojë transferimin e Osimhen te Galatasaray, ndryshe ‘pasojat do të jenë të rënda’ për të dhe për babanë e tij, presidentin e klubit, Aurelio De Laurentiis. 

Ky person madje ka përdorur gjuhë tronditëse, duke kërcënuar hapur jetën e familjes De Laurentiis nëse transferimi nuk realizohet. 

Osimhen, i cili kaloi sezonin e fundit në formë huazimi te Galatasaray, dëshiron që transferimi të bëhet i përhershëm. 

Megjithatë, Napoli dhe klubi turk nuk kanë arritur ende marrëveshje për shumën e transferimit. 

Sipas ekspertit italian, Alfredo Pedulla, Napoli kërkon që të aktivizohet klauzola prej 75 milionë eurosh, me të paktën 50 milionë euro pagesë fikse. 

Ky incident i rëndë ka ngritur shqetësime serioze për sigurinë e drejtuesve të klubit italian dhe ka thelluar tensionet për këtë çështje të ndjeshme transferimi.