Sarri shtrohet në spital

Trajneri i Lazios, Maurizio Sarri, është shtruar mëngjesin e së mërkurës në një klinikë private në Romë për shkak të një gjendjeje të papritur shëndetësore. Sipas asaj që raporton prestigjiozja italiane La Repubblica, 65-vjeçari është pranuar në klinikën Villa Mafalda, një nga institucionet më të njohura mjekësore në kryeqytetin italian.

Gjendja e tij shëndetësore nuk është bërë ende e ditur në mënyrë zyrtare nga klubi apo familjarët, ndërsa mediat italiane shkruajnë se trajneri ka pasur shqetësime që kanë kërkuar ndërhyrjen e menjëhershme mjekësore. Ende nuk dihet nëse bëhet fjalë për ndonjë problem të rëndë apo vetëm për kontrolle të zakonshme mjekësore pas lodhjes së periudhës përgatitore.

Sarri, i njohur për stilin e tij të veçantë të drejtimit dhe për përkushtimin e tij ndaj futbollit taktik, ka qenë në krye të Lazios që nga viti 2021, transmeton KosovaPress.

Në pritje të një komunikate zyrtare nga klubi i Lazios, tifozët dhe opinioni sportiv në Itali shpresojnë që gjendja e Sarrit të mos jetë serioze dhe që ai të rikuperohet sa më shpejt për t’u rikthyer pranë skuadrës në prag të sezonit të ri të Serie A.