Ofertë mbi 70 milionë euro për kartonin dhe pagë me vlerë 14 milionë euro

Luis Diaz është kthyer në një nga emrat më të nxehtë të merkatos verore dhe tashmë Bayerni i Mynihut duket i vendosur për ta fituar garën ndaj Barcelonës për kolumbianin.

Sipas raportimeve të fundit nga BILD, bavarezët janë gati të paraqesin një ofertë mbi 70 milionë eurosh për kartonin e 28-vjeçarit, ndërsa janë në bisedime të avancuara me Liverpooli-n.

Nga ana tjetër, Barcelona, që e ka pasur Diaz-in në listën e dëshirave prej kohësh, ndodhet në vështirësi për të përballuar një ofertë të tillë financiare, për shkak të kufizimeve buxhetore dhe rregullit të famshëm “1:1” që rikthehet në fuqi në gusht.

Përveç ofertës për transferim, Bayerni po ofron edhe një kontratë shumë joshëse për lojtarin: një marrëveshje deri në vitin 2029 me opsion rinovimi deri në 2030 dhe një pagë vjetore bruto prej rreth 14 milionë eurosh, dyfishi i asaj që Diaz fiton aktualisht te Liverpool-i.

Pavarësisht ofertës së majme, lojtari ende nuk ka marrë një vendim përfundimtar, pasi dëshira e tij e parë mbetet kalimi te Barcelona. Katalanasit janë duke u përpjekur ta bindin të mos pranojë menjëherë ofertën e Bayern-it dhe të presë deri në gusht, kur ata do të kenë më shumë hapësirë financiare për të vepruar.

Liverpool-i ndërkohë duket i gatshëm të hapë bisedimet për largimin e Diaz-it, pas avancimeve që kanë bërë për sulmuesin e Eintracht Frankfurtit, Hugo Ekitike, dhe interesimit për Rodrygo-n e Real Madridit, në rast se shiten disa nga sulmuesit aktualë.

Garë e fortë në horizont dhe një vendim i rëndësishëm për Diaz-in: bavarezët ofrojnë gjithçka tani, ndërsa Barcelona mbështetet te durimi dhe dëshira e lojtarit për të veshur fanellën ‘blaugrana’.