Rusia godet me dhjetëra raketa e dronë Pavlohradin, sulmi më i madh ndonjëherë në këtë qytet ukrainas

Rusia ka ndërmarrë një nga sulmet më të rënda ajrore në Ukrainë, duke goditur qytetin lindor Pavlohrad në orët e para të së shtunës, në kuadër të një vale të gjerë bombardimesh në të gjithë vendin, që përfshiu qindra dronë kamikazë dhe raketa balistike.

Sipas autoriteteve lokale, bombardimi gjashtëorësh është cilësuar si më i rëndi në historinë e qytetit.

“Një natë dhe mëngjes ferr për Pavlohrad. Sulmi më intensiv ndaj qytetit. Shpërthim pas shpërthimi. Terroristët rusë e shënjestruan atë me raketa dhe dronë”, deklaroi kreu i rajonit të Dnipropetrovskit, Sergey Lysak.

Ai tha se një fabrikë u dëmtua rëndë, një stacion zjarrfikësish u shkatërrua plotësisht, ndërsa një ndërtesë banimi pesëkatëshe u godit drejtpërdrejt.

Dronët dëgjoheshin teksa fluturonin mbi qytet gjatë natës, ndërkohë që shpërthime të fuqishme ndriçonin qiellin. Njësitë kundërajrore reaguan me zjarr të vazhdueshëm për të rrëzuar mjetet fluturuese.

Në mëngjes, qyteti ishte i mbuluar nga re të dendura tymi të zi dhe disa zjarre kishin përfshirë ndërtesat e goditura.