Një zjarr i madh pyjor detyron evakuimin në disa fshatra të Greqisë

Një zjarr i madh shpërtheu pranë qytetit jugor grek të Korinthit të martën, duke detyruar evakuimin e disa fshatrave ndërsa zjarrfikësit po luftonin me flakët në kushte shumë të vështira, thanë autoritetet.

Sipas mediave të huaja, përcjell Telegrafi, më shumë se 180 zjarrfikës, të mbështetur nga 15 aeroplanë dhe 12 helikopterë, u vendosën për të shuar flakët në një pyll me pisha në zonën malore të komunës, sipas departamentit lokal të zjarrfikësve.

Nuk pati raportime të menjëhershme për lëndime.

Temperaturat në disa pjesë të Greqisë janë rritur në rreth 40 gradë Celsius gjatë verës, duke krijuar kushte të vështira për ekipet e emergjencës.

Zjarret në pyje janë të zakonshme gjatë verave të nxehta dhe të thata të Greqisë dhe autoritetet kanë reaguar ndaj dhjetëra shpërthimeve deri më tani këtë vit.

Qeveria greke tha në maj se po dërgonte një numër rekord zjarrfikësish dhe pothuajse do të dyfishonte flotën e saj të dronëve këtë verë për të adresuar rreziqet në rritje të zjarreve në pyje.

Rreziku i zjarreve në rajon mbetet i lartë për shkak të valëve të vazhdueshme të nxehtësisë, thatësirës dhe erërave të forta. Ekspertët thonë se ndryshimi i klimës po i përkeqëson ato.