Fabregas ndez ëndrrat: “Kurrë mos thuaj kurrë” për Messin te Como

Cesc Fabregas ka hedhur benzinë mbi zjarrin e një thashethemi të verës që po përhapet me shpejtësi në Itali: Lionel Messi te Como. Me vetëm tre fjalë – “kurrë mos thuaj kurrë” – të thëna në konferencën për shtyp para ndeshjes kundër Al-Ahli, trajneri i klubit italian ka hapur portën e ëndrrave për tifozët larianë.

Burime të ndryshme kanë përforcuar spekulimet: gruaja e Messit, Antonela, është parë në stadiumin "Sinigaglia", ndërsa familja e tij ka kaluar disa ditë pushimi në zonën e liqenit. Fabregas e pranoi se “Messi ishte në shtëpinë time me pushime” dhe theksoi miqësinë e ngushtë mes familjeve.

Megjithëse ideja duket thuajse e pamundur, Como ka fuqinë financiare për të realizuar një transferim të tillë. Klubi ka shpenzuar 104 milionë euro në këtë merkato dhe Messi do të ishte kulmi i një revolucioni sportiv.

Në moshën 38-vjeçare, Messi po shkëlqen ende me Inter Miami-n, ku ka shënuar 18 gola në po aq ndeshje këtë sezon. Ai do të jetë lojtar i lirë nga dhjetori dhe Inter Miami po përpiqet ta mbajë me rinovim, ndërsa interesimi nga Arabia Saudite mbetet i fortë.

Për momentin, gjithçka mbetet në nivelin e fantazisë, por siç tha Fabregas: kurrë mos thuaj kurrë.