Zbulohet arsyeja se pse mungoi Messi në ndeshjen e All-Star Game

Lionel Messi nuk ishte i pranishëm në ndeshjen shumë të pritur All-Star Game, ku yjet më të mirë të MLS-së triumfuan ndaj një përzgjedhjeje të futbollistëve të Liga MX.

Vendimi për të mos marrë pjesë u mor në marrëveshje me stafin teknik të Inter Miami, për arsye paraprake dhe në funksion të menaxhimit të ngarkesës fizike të argjentinasit.

Messi ka zhvilluar pesë ndeshje të plota në MLS gjatë 14 ditëve të fundit, përveç katër dueleve në Kupën e Botës për Klube, ku Inter Miami arriti deri në fazën e 1/8-ave, përpara se të eliminohej nga PSG.

Ky kalendar i ngjeshur ka lënë gjurmë dhe stafi mjekësor vendosi të ndalë yllin argjentinas për të shmangur komplikacione të mëtejshme.

Trajneri Javier Mascherano zbuloi se Messi kishte ndier shqetësime që në ndeshjen ndaj Portos, edhe pse nuk ka ende një komunikatë mjekësore zyrtare. Megjithatë, sipas raportimeve, nuk do të ketë ndonjë ndëshkim disiplinor, ndryshe nga ajo që ndodhi në të kaluarën me Zlatan Ibrahimovic, i cili u sanksionua për mungesën në një All-Star Game të zhvilluar në fushë sintetike.

Inter Miami është fokusuar plotësisht te ndeshjet zyrtare: të shtunën do të përballet me Cincinnati në MLS dhe të mërkurën tjetër me Atlas nga Meksika në Leagues Cup.