Viktor Gyokeres tashmë ka thyer rekordin që as Thierry Henry nuk e kishte arritur te Arsenali

Viktor Gyokeres është gati të realizojë ëndrrën e tij për të luajtur në Ligën Premier, pasi sulmuesi suedez ka kompletuar transferimin e shumëpritur te Arsenali. Ish-sulmuesi i Sporting Lisbonës dhe Coventry City ka shkruar menjëherë histori në klubin e tij të ri.

Arsenal arriti marrëveshje me kampionët portugezë javën e kaluar për një shumë që raportohet të jetë e majme, pasi Gyokeres shënoi 97 gola në 102 ndeshje për Sporting në të gjitha garat.

27-vjeçari ishte pranë ngjitjes në Ligën Premier me Coventry dy vite më parë dhe ka qenë i lidhur me klube si Manchester United dhe vetë Arsenali, përpara se londinezët ta fitonin garën për nënshkrimin e tij këtë verë.

Për të treguar besimin e tij se mund të përsërisë formën e jashtëzakonshme nga Portugalia në elitën angleze, Gyokeres ka marrë fanellën me numrin 14, numër që dikur i përkiste legjendës Thierry Henry.

Henry e përfundoi karrierën e tij të parë te Arsenali me 174 gola në Ligën Premier dhe pesë trofe madhorë, duke bërë që fanella me numrin 14 të ketë një domethënie të veçantë në historinë e klubit.

Gyokeres tashmë ka kapërcyer pengesën e parë simbolike: ka thyer rekordin e shitjeve të fanellave të Arsenalit. Sipas The Athletic, kërkesa për fanellën me emrin e tij ka tejkaluar çdo tjetër nënshkrim të kohëve të fundit.

“Ndërsa të dhënat nga pikë të ndryshme shitjeje dhe shitës me pakicë janë ende duke u analizuar, është tashmë e qartë se kërkesa për fanellën me numër 14 të Gyokeres tejkalon atë të çdo nënshkrimi në historinë e kohëve të fundit”, raporton The Athletic.

Për të shënuar ardhjen e tij, Arsenali ofroi personalizimin falas të emrit të Gyökeres në të gjitha fanellat e sezonit të ardhshëm – një shërbim që zakonisht kushton 20 euro. Kërkesa ishte aq e madhe, sa faqja zyrtare e dyqanit u bllokua përkohësisht.