Ardon Jashari sot mbanë takim me drejtuesit e Club Brugge, mesfushori vazhdon të kërkojë largimin

Mesfushori i ri shqiptar, Ardon Jashari, do të zhvillojë sot një takim vendimtar me drejtuesit e Club Brugge, në përpjekje për të zyrtarizuar largimin e tij nga klubi belg.

Bisedimet pritet të jenë të drejtpërdrejta dhe intensive, me Jasharin që synon të ritheksojë dëshirën e tij për t’u transferuar tek AC Milan, skuadër me të cilën ka arritur marrëveshje personale.

Mediat belge dhe ato italiane raportojnë se 21-vjeçari ka rënë dakord për një kontratë afatgjatë me gjigantët e Serie A dhe është i vendosur ta realizojë këtë lëvizje gjatë kësaj vere.

Pavarësisht ngurrimit të Club Brugge për ta shitur, Jashari do të kërkojë që t’i jepet drita jeshile për t’u larguar, duke besuar se kalimi tek Milan do të jetë një hap i rëndësishëm në zhvillimin e tij profesional.

Nga ana tjetër, AC Milan mbetet optimiste për arritjen e marrëveshjes me klubin belg dhe po punon për të finalizuar detajet e fundit të transferimit.

Jashari, i cili është një nga talentet më premtues në Evropë, e sheh këtë mundësi si ideale për të bërë kapërcimin në një nivel më të lartë.

Takimi i sotëm mund të jetë vendimtar për të ardhmen e tij, ndërsa tifozët presin me padurim të shohin nëse transferimi i shumëpërfolur do të konkretizohet.

Milani ka bërë një ofertë prej 33,5 milionë eurove plus pesë të tjera në formë bonusesh për reprezentuesin e Zvicrës.