Krijuesi i “Peaky Blinders” po punon për zhvillimin e një skenari për një film të James Bond

I krijuesi i serialit të famshëm Peaky Blinders, “Steven Knight”, do të jetë skenaristi i filmit të ardhshëm për James Bond, që do të drejtohet nga regjisori i njohur Denis Villeneuve.

Ky projekt po zhvillohet nga studioja Amazon MGM, ndërsa prodhimin e filmit të ri për agjentin 007 do ta marrin përsipër Amy Pascal dhe David Heyman, përmes kompanive të tyre Pascal Pictures dhe Heyday Films. Tanya Lapointe do të jetë producente ekzekutive.

Steven Knight fitoi famë botërore si autor, producent ekzekutiv dhe skenarist kryesor i serialit Peaky Blinders, në të cilin luan Cillian Murphy. Ai ka krijuar gjithashtu seriale të tjera të njohura si See, A Thousand Blows dhe All the Light We Cannot See.

Në korrik, Denis Villeneuve u konfirmua zyrtarisht si regjisori i filmit të 26-të për James Bond. Variety raportoi se studioja po përshpejton përzgjedhjen e skenaristit, duke pasur parasysh datën e planifikuar të premierës në vitin 2028. Sipas burimeve, çdo datë më e hershme do të ishte e pamundur për shkak të përmasave të mëdha të projektit.

Hapi i radhës më i rëndësishëm do të jetë zgjedhja e aktorit që do të pasojë Daniel Craig në rolin e agjentit më të famshëm sekret në botë. Zhvillimi i filmit të ri për Bond është prioritet i lartë që prej vitit 2021, kur Amazon bleu MGM dhe bibliotekën e pasur të filmave të saj. 

Filmi i tij i parë i prodhuar, Dirty Pretty Things, me regji të Stephen Frears, ishte i nominuar për çmimin Oscar për skenarin më të mirë origjinal. Knight ka shkruar edhe skenarët e filmave të nominuar për Oscar, si Eastern Promises dhe Spencer. Ai ka qenë gjithashtu regjisor i filmave Hummingbird, Locke dhe Serenity. Ndër projektet e tij të ardhshme përfshihen filmi i shumëpritur Peaky Blinders për Netflix dhe drama historike House of Guinness.