Gati të shesë mbrojtësin veteran te skuadra e Ronaldos

Klubi i Barcelonës po përballet me një zhvillim të papritur në mbrojtje, pasi veterani Inigo Martinez është pranë largimit nga skuadra, me interes të madh nga klubi saudit Al-Nassr.

Sipas raportimeve të fundit nga Matteo Moretto dhe konfirmimeve të Fabrizio Romanos, mbrojtësi spanjoll dhe Barcelona po diskutojnë kushtet e një largimi të mundshëm, duke bërë kështu një kthesë surprizuese pas rinovimit të kontratës së tij në fillim të këtij viti.

Martinez ishte një nga figurat kyçe në formacionin e Barcelonës sezonin e kaluar, ku skuadra fitoi tre trofe dhe mbrojtësi përshtatej mirë me taktikat e trajnerit Hansi Flick, duke qenë pjesë e rëndësishme në zbatimin e kapjes në ‘offside’.

Megjithatë, gjatë turneut parasezonal në Azi, ai nuk luajti shumë për shkak të lodhjes dhe konkurrencës nga lojtarë të rinj si Pau Cubarsi, Ronald Araujo dhe Andreas Christensen, që po kërkojnë hapësira në skuadër. Kjo ka bërë që Martinez, për shkak të moshës dhe shqetësimeve fizike, të marrë vendimin për të nisur një aventurë të re në Lindjen e Mesme.

Largimi i tij pritet të ndihmojë Barcelonën të lirojë hapësirë në pagat e lojtarëve, çka është thelbësore për regjistrimin e blerjeve të reja të klubit. Negociatat janë në zhvillim dhe pritet që së shpejti të ketë një përfundim në këtë çështje.