PSG e ka vendosur

Paris Saint-Germain ka vendosur të përshpejtojë tregun e transferimeve, i nxitur nga padurimi i Luis Enriques për të marrë shpejt përforcimet e shumëpritura.

Menaxhmenti ka ndërmarrë hapa konkretë në dy fronte: mbërritja e mbrojtësit ukrainas Illia Zabarnyi nga Bournemouth (për afërsisht 63 milionë euro) tani duket e afërt, por lajmi i vërtetë ka të bëjë me portierin, pasi Lucas Chevalier është gati të bëhet numri një i ri i kampionëve evropianë.

Pas disa ditësh negociatash, është arritur një marrëveshje me Lille: 40 milionë euro fikse plus 15 milionë euro në bonuse lehtësisht të arritshme. Portieri francez, i lindur në vitin 2001, pritet të jetë sot në Paris për vizitat mjekësore përpara se të nënshkruajë një kontratë pesëvjeçare.

Qëllimi është i qartë: të jetë në fushë të mërkurën kundër Tottenham në Superkupën e Evropës, një sinjal i fortë nga kampionët evropianë, të cilët po kthejnë faqe pas çështjes Donnarumma.

Portieri italian, kontrata e të cilit skadon në vitin 2026, nuk mundi të arrinte një marrëveshje për rinovimin dhe kështu ka humbur vendin e tij si titullar. L’Equipe zbulon se ish-portieri i Milanit ishte në dijeni të situatës dhe ekipi i tij tashmë ka eksploruar tregun e transferimeve, Manchester United dhe Galatasaray janë të interesuar, por për momentin Gigio po qëndron në Paris, i vetëdijshëm se klubi nuk ka ndërmend të përjetojë një dualitet të ri në portë.

Luis Campos ka qenë i qartë, asnjë rotacion, Chevalier do të jetë titullar. PSG dëshiron të shmangë tensionet në dhomën e zhveshjes dhe është i hapur për shitjen e një prej figurave kyçe në sukseset e tyre të fundit. Nëse ai nuk largohet, rrezikon të mbetet jashtë loje.