Barcelona i rikthen shiritin e kapiteni

Barcelona dhe portieri gjerman Marc-André ter Stegen e kanë zgjidhur mosmarrëveshjen e tyre, me lojtarin që ka rënë dakord t’ia japë të dhënat e tij mjekësore La Ligës. Klubi katalanas e njoftoi këtë.

“Marc-André ter Stegen ka nënshkruar autorizimin që shërbimet mjekësore të klubit të paraqesin raportin e detyrueshëm mjekësor La Ligës pas operacionit të tij”, thuhet në një deklaratë të lëshuar nga Barça.

Procedurat disiplinore janë mbyllur dhe lojtari rifiton shiritin e kapitenit të ekipit të parë me efekt të menjëhershëm. Disa orë më parë, në një mesazh të postuar në rrjetet e tij sociale, 33-vjeçari gjerman kishte deklaruar veten “plotësisht të disponueshëm” për të bashkëpunuar me klubin e tij.

Ter Stegen, i cili kohët e fundit iu nënshtrua një operacioni në shpinë, ishte në konflikt me drejtuesit e Barcelonës, kampionëve në fuqi të Spanjës, sepse refuzoi të ndante të dhënat e tij mjekësore me La Ligën, gjë që duhet t’i lejojë organit qeverisës të futbollit profesionist spanjoll të vlerësojë kohëzgjatjen e mungesës së tij nga fusha.