Lituania do t’i stërvisë fëmijët që nga mosha 8 vjeç për të drejtuar dronë

Fëmijët në Lituani do të mësohen se si të ndërtojnë dhe të përdorin dronë si pjesë e përpjekjeve të vendit të vogël baltik për të ndërtuar kapacitete për t’u përballur me çdo kërcënim të ardhshëm nga Rusia.

Në një iniciativë të përbashkët nga ministritë e mbrojtjes dhe arsimit, qeveria tha se shpresonte t’u mësonte më shumë se 22,000 njerëzve, përfshirë nxënësve të shkollave, aftësi për përdorimin e dronëve si pjesë e një përpjekjeje për të “zgjeruar trajnimin e rezistencës civile”.

Programi do të përshtatet për grupmosha të ndryshme, me nxënës të klasës së tretë dhe të katërt të moshës tetë deri në dhjetë vjeç që do të mësojnë të ndërtojnë dhe pilotojnë dronë të thjeshtë.

Nxënësit e shkollave të mesme do të projektojnë dhe prodhojnë pjesë për dronë dhe do të mësojnë se si të ndërtojnë dhe të fluturojnë dronë të përparuar, shkruan the Guardian.

Ashtu si fqinjët e saj Estonia dhe Letonia, Lituania, një vend me 2.8 milionë banorë që kufizohet me enklavën ruse të Kaliningradit dhe aleatin e Moskës, Bjellorusinë, ka qenë në gatishmëri të lartë për luftë që nga pushtimi i plotë i Ukrainës nga Vladimir Putin.

Perceptimi i një kërcënimi rus në shtetet baltike u theksua të mërkurën nga dëbimi i një diplomati rus nga Estonia.

Ministri i jashtëm i Estonisë, Margus Tsahkna, tha se kjo ishte për shkak të “ndërhyrjes së vazhdueshme” në punët e shtetit.

“Diplomati në fjalë ka qenë i përfshirë drejtpërdrejt dhe aktivisht në minimin e rendit kushtetues dhe sistemit ligjor të Estonisë… Ndërhyrja e vazhdueshme e ambasadës ruse në punët e brendshme të Republikës së Estonisë duhet të marrë fund”, tha Tsahkna.

Raportohet se në Lituani, qeveria planifikon të shpenzojë 3.3 milionë euro për pajisje të specializuara, duke përfshirë dronë, sisteme kontrolli dhe transmetimi video dhe një aplikacion celular për trajnim mbi mjetet ajrore pa pilot (UAV).