Gjiganti italian intensifikon bisedimet për transferimin e Chiesas

Milani mbetet i interesuar për Federico Chiesa, raportojnë burime nga Italia, ndërsa kuqezinjtë janë në kontakt me përfaqësuesit e lojtarit.

Sipas asaj që raporton MilanNews24, Milani po përpiqet të bëjë një lëvizje të vonshme për ta sjellë sulmuesin e Liverpoolit si “qershinë mbi tortë” në këtë afat kalimtar veror, ndërkohë që klubi vazhdon kërkimin për një sulmues rezervë.

Kuqezinjtë janë lidhur gjithashtu fuqishëm me një transferim të sulmuesit të Manchester United, Rasmus Hojlund, megjithatë deri tani nuk është bërë asnjë ofertë konkrete.

Federico Chiesa shënoi dje në fitoren 4-2 të Liverpoolit ndaj Bournemouthit në javën e parë të Ligës Premier. Pas një sezoni ku ishte shpesh në stol, italiani u shpreh i lumtur që më në fund la gjurmë dhe ia dedikoi golin shokut të skuadrës, Diogo Jota.

Tani, trajneri i tij i mëparshëm, Massimiliano Allegri, po konsideron një ribashkim me lojtarin në Lombardi.

Pasi kanë punuar së bashku te Juventusi, Allegri e njeh mirë Chiesën dhe nëse arrihet një marrëveshje, është ende e mundur që sulmuesi të transferohet te Milani gjatë kësaj vere.