Ylli i Como-s nuk e përjashton mundësinë e rikthimit te Reali

Mesfushori argjentinas Nico Paz, i cili sezonin e kaluar shkëlqeu me fanellën e Como-s në Serie A, nuk e ka përjashtuar mundësinë e rikthimit te Real Madridi në të ardhmen.

20-vjeçari një vit më parë u largua nga “Los Blancos” për t’u bashkuar me klubin italian, ku zhvilloi një sezon të shkëlqyer, duke u bërë një nga lojtarët më premtues të skuadrës.

Këtë verë, ai ka firmosur kontratë afatgjatë me Como-n, por gjithsesi ai e pranon se e ardhmja mund të rezervojë surpriza.

“Ju kurrë nuk e dini të ardhmen. Jam i përqendruar te Como, që është vendi ku i përkas. Jam shumë i lumtur dhe i emocionuar. Nuk kam asnjë ide se çfarë do të më sjellë e ardhmja, nuk e di as çfarë do të bëj nesër… Po formojmë një ekip të mirë, me një staf teknik të shkëlqyer, në një qytet dhe ambient fantastik. Nuk mund të kërkoja më shumë tani”, ka thënë Paz për ‘AS’.

Me talentin dhe moshën e tij, një rikthim te Real Madrid në të ardhmen nuk duket aspak i pamundur, sidomos nëse Paz vazhdon të tregojë paraqitjet e mira në Serie A.