Allegri i ka treguar Milanit dy lojtarët që do

Massimiliano Allegri dëshiron të ribashkohet me Adrien Rabiot, pavarësisht nëse Yunus Musah largohet apo jo, por pengesa kryesore për Milanin mbeten kostot e larta të operacionit, si në pagë ashtu edhe në komisione.

Lidhja mes trajnerit kuqezi dhe ish-mesfushorit të tij te Juventusi është e njohur prej kohësh. Pas ndarjes së Rabiot me Olympique Marseille pas përplasjes në dhomat e zhveshjes, Milani doli menjëherë në skenë si opsion konkret. Napoli gjithashtu ka pyetur për lojtarin, por Milani ka rritur interesin gjatë ditëve të fundit.

Plani i kuqezinjve është të afrojnë një mesfushor në rast se Musah shitet, megjithatë transferimi i Rabiot mbetet i mundshëm edhe nëse amerikani qëndron.

Rabiot, i cili është nën kontratë me Marseille, kërkon një pagë prej të paktën 5.5-6 milionë eurosh në sezon, pa llogaritur bonuset dhe komisionet për transferimin.

Ky është i njëjti problem që shfaqet edhe për një tjetër dëshirë të Allegrit, sulmuesin e Juventusit, Dusan Vlahovic.

Kufiri i pagave dhe politikat financiare të Milanit aktualisht e bëjnë të vështirë afrimin e këtyre yjeve. Megjithatë, nëse kuqezinjtë duan të bëjnë hapin vendimtar për të konkurruar në nivelet më të larta, mund t’u duhet të bëjnë disa përjashtime nga rregullat e tyre buxhetore.