Erdogan telefonon Zelenskyn, Turqia do kontribuojë në sigurinë e Ukrainës pas luftës

Presidenti i Turqisë, Recep Tayyip Erdogan, zhvilloi sot një bisedë telefonike me Presidentin e Ukrainës, Volodymyr Zelensky, sipas një njoftimi të bërë publik të enjten nga një zëdhënës i qeverisë turke.

Gjatë bisedës, në qendër të diskutimeve ishin marrëdhëniet dypalëshe mes Turqisë dhe Ukrainës, si dhe situata e luftës në Ukrainë.

Erdogan theksoi se Turqia po ndjek me vëmendje takimet e presidentit të SHBA-së, Donald Trump, me Zelenskyn dhe presidentin rus, Vladimir Putin. Ai siguroi se Ankaraja do të vazhdojë të punojë për një zgjidhje paqësore të konfliktit dhe të kontribuojë për sigurinë e Ukrainës edhe pas përfundimit të luftës.

Gjithashtu, presidenti turk ripohoi gatishmërinë e tij për të ndërmarrë çdo hap të nevojshëm që do të ndihmonte në zhvillimin e kontakteve të nivelit të lartë, të cilat mund të hapin rrugën drejt paqes.