Mbyllen lokalet që dyshoheshin për prostitucion: Ku mbetën gratë që punuan aty?

Zhurmave dhe sjelljeve të pahijshme të punëtorëve të disa prej kafeneve që kishin pushtuar këtë rrugë përballë Kishës Katolike në Ferizaj, u erdhi fundi.

Kjo ndodhi vetëm pas raportimit të Kiks Kosova, pasi muri që kishte ngritur ky institucion fetar nuk mjaftoi që ta fshihte veprimtarinë që po zhvillohej në këto kafene.

Lagjja dhe Kisha do të jenë të qeta për një kohë të pacaktuar.

Kjo sepse lokaleve u është ndaluar puna nga Inspektorati Sanitar në bashkëpunim me Njësitin për luftimin e trafikimit me qenie njerëzore.

Institucionet kishin ndërmarrë këtë aksion për ndalimin e veprimtarive ilegale dhe pengimin e riteve fetare, pasi Kiks Kosova kishte raportuar lidhur me shqetësimet e Kishës Katolike “Engjëlli Rojës”

Por ky raportim nuk qe i zakonshëm për ekipin.

Teksa po kryenin punën, gazetarja dhe kameramani u sulmuan nga punëtorja e njërit prej lokaleve.

Kjo e fundit në mënyrë të ashpër goditi kamerën dhe kameramanin. Ajo nuk kurseu as sulmet fizike drejt kameramanit.

Ky nuk ishte problem vetëm i Kishës, por edhe i gjithë qytetarëve.

Derisa Kiks Kosova raportonte nga aty, qytetarët nuk hezituan të tregonin mllefin për pamjet e pahijshme që shihnin çdo ditë.

Të tjerët ishin të shqetësuar për më të vegjlit e tyre, pasi ata janë të ekspozuar çdo ditë ndaj dukurive jo të mira. Kisha Katolike “Engjëlli Rojës” në Ferizaj, para se të kërkonte zgjidhje nga Kiks Kosova, kishte dërguar ankesë edhe në Ministrinë e Kulturës dhe në Komunën e Ferizajt, mirëpo ankesa e tyre kishte mbetur pa përgjigje.