Kievi shpreson te ndalimi i luftimeve, Zelensky: Garancitë e sigurisë për Ukrainën do të jenë gati javën e ardhshme

Presidenti i Ukrainës, Volodymyyr Zelensky, ka pohuar se një kuadër i plotë i “garancive të sigurisë” për Kievin në rast të një armëpushimi ose marrëveshjeje paqeje me Rusinë do të jetë gati që javën e ardhshme.

Në një postim në Telegram të enjten, Zelensky tha se kishte folur me Presidentin turk Rexhep Tajip Erdogan, duke shtuar se ata kishin “diskutuar hapat e ardhshëm diplomatikë” për të zgjidhur konfliktin.

“Është folur shumë për garancitë e sigurisë. Këshilltarët e sigurisë kombëtare po punojnë aktualisht në zhvillimin e secilit komponent specifik dhe javën tjetër i gjithë konfigurimi do të jetë në letër”, shtoi Zelensky.

Sipas udhëheqësit ukrainas, Erdogan e përfshiu ministrin e tij të mbrojtjes në këtë proces për të shqyrtuar “si Turqia mund të ndihmojë në garantimin e sigurisë, përfshirë Detin e Zi”.

Zyra e Erdoganit e konfirmoi telefonatën, duke thënë se Ankaraja do të vazhdojë përpjekjet për të siguruar një “paqe të qëndrueshme” dhe është e gatshme të kontribuojë në sigurinë e Ukrainës sapo të përfundojnë armiqësitë.

Javën e kaluar, Zëvendësministri i Jashtëm i Ukrainës, Sergey Kislitsa, tha se zyrtarët perëndimorë po punonin për garancitë e sigurisë, duke premtuar se një draft i parë do të përgatitej deri në fund të gushtit. Megjithatë, ai theksoi se Kievi “është kategorikisht kundër shkëmbimit të tokës sonë për paqe”, megjithëse raportet e mëparshme të medias sugjeruan se Ukraina mund të binte dakord t’i lëshonte territore Moskës.

Këtë javë, Politico raportoi se udhëheqësit evropianë po shqyrtonin një propozim për një zonë tampon prej 40 km midis vijave ruse dhe ukrainase në një skenar armëpushimi, potencialisht të patrulluar nga trupat perëndimore. Një diskutim tjetër thuhet se sillej rreth përfshirjes së një vendi të tretë neutral për të mbikëqyrur zbatimin e një armëpushimi.

Rusia ka thënë se nuk është kundër konceptit të garancive të sigurisë për Ukrainën, por ka theksuar se çdo kuadër duhet të përfshijë anëtarët e Këshillit të Sigurimit të OKB-së. Moska ka kundërshtuar kategorikisht vendosjen e trupave të NATO-s në Ukrainë në çdo formë, duke përsëritur se kërkon të adresojë shkaqet rrënjësore të konfliktit, përfshirë zgjerimin e bllokut drejt kufijve rusë.