Alban Bushi para ndeshjeve: Kemi edhe 2-3 futbollistë që po presim

Kombëtarja shqiptare U-21 do të luajë 2 ndeshje miqësore pas disa ditësh. Saktësisht më 5 shtator do të presin në “Elbasan Arena” skuadrën e Gjermanisë U-21, ndërsa 3 ditë më vonë do të luajnë në transfertë ndaj Zvicrës.

Ndeshje këto që do t’i shërbejnë Alban Bushit për t ëparë dhe testuar futbollistët. Kështu trajneri i kuqezinjve ka publikuar dhe listën e të grumbulluarve ditën e sotme, ndërsa ka folur edhe për zgjedhjet e tij.

“Për sa i përket Kurtit dhe Tahos, kanë qenë pjesë e moshave të ekipeve kombëtare.

Ne kemi nevojë për mbrojtës dhe portier. Mendoj që të dy janë lojtarë që do të jenë pjesë edhe e kombëtares A mbase në të ardhmen se kanë shumë potencial. Për momentin i kemi afruar për t’i parë më nga afër, meqë janë edhe miqësore. Ta dimë edhe më mirë potencialin e tyre. Mendoj se janë dy lojtarë shumë premtues.

Mendoj që kemi bërë maksimumin përsa i përket lojtarëve nga kampionati shqiptar. Nuk është se ka shumë. Këto të 6 mendoj janë cilësorë dhe janë në formë, kanë minuta në këmbë, janë titullarë në ekipet e tyre. Mendoj se do na ndihmojnë në këto dy ndeshje. Lojtarë që kanë qenë edhe më përpara, siç është Gudjufi. Ka qenë vjet, por nuk ka pasur shumë minuta.

Tani ka filluar të luajë te Partizani, kam shumë besim tek ai. Ndeshjen e fundit me Vorën e pashë “live” dhe m’u duk shumë në formë.

Gruda dhe Ëeiper te Gjermania U-21, keni qenë duke pritur për ndonjë risi? Kemi pasur 2-3 lojtarë që po i presim akoma. Janë shqiptarë të Kosovës dhe Maqedonisë së Veriut. Jemi në pritje të lojtarëve që janë cilësorë dhe kanë potencial, po presim akoma për t’i marrë. Për sa i përket lojtarëve të vendit kemi lënë disa jashtë sepse nuk kanë qenë në formë optimale.

Kevin Dodaj që luan me CSKA është i dëmtuar, Daka i Vorës nuk ka marrë shumë minuta te dhe për momentin nuk është pjesë e ekipit. Patjetër që do të jenë lojtarë që do na ndihmojnë në të ardhmen”, ka theksuar timonieri i Shpresave.