Zelensky reagoi pas vrasjes së ish-kryetarit të parlamentit ukrainas – ekzekutuesi ishte shpërndarës i ushqimeve

Presidenti ukrainas, Volodymyr Zelensky është informuar për vrasjen e ish-kryetarit të parlamentit, Andriy Parubiyt, i cili u qëllua për vdekje nga një shpërndarës ushqimesh.

Forcat e rendit janë në kërkim të autorit të sulmit dhe po punojnë për të zbuluar identitetin e tij.

Volodymyr Zelensky e quajti vrasjen “të tmerrshme” dhe i shprehu ngushëllimet familjes dhe miqve të politikanit.

“Ministri i Punëve të Brendshme të Ukrainës, Ihor Klymenko, dhe Prokurori i Përgjithshëm, Ruslan Kravçenko, sapo kanë zbardhur rrethanat e para të njohura të vrasjes së tmerrshme në Lviv. Andriy Parubiy është vrarë. Ngushëllimet e mia për familjen dhe të afërmit e tij.Të gjitha forcat dhe mjetet e nevojshme janë angazhuar në hetimin dhe kërkimin e vrasësit”, shkroi ai në Telegram.

Vrasësi, i maskuar si shpërndarës i ushqimeve, qëlloi tetë herë ndaj Parubiyt, më pas futi pistoletën në çantë dhe u largua me biçikletë elektrike.

Ndryshe, Parubiy drejtoi Parlamentin nga viti 2016 deri në 2019 dhe më herët shërbeu si Sekretar i Këshillit të Sigurisë Kombëtare dhe Mbrojtjes.

Në vitin 2016, Parubiy u zgjodh kryetar i Verkhovna Rada në vend të Volodymyr Groysman, i cili u zgjodh kryeministër i Ukrainës.

Ai shërbeu si Sekretar i Këshillit të Sigurisë Kombëtare dhe Mbrojtjes nga shkurti deri në gusht të vitit 2014.

Po atë vit u bë një tentativë tjetër për vrasjen e Parubiy me një granatë luftarake.

Më vonë, Ministria e Punëve të Brendshme raportoi se atentati ishte përgatitur nga një punonjës i Shërbimit të Sigurisë së Personelit (UDO) nga koha e ish-presidentit ukrainas, Viktor Yanukovychit.

Në vitet 2013–2014, gjatë Revolucionit të Dinjitetit, ai ishte komandant i Majdanit dhe drejtues i Mbrojtjes Vetjake të Majdanit