KF Shkëndija: Me kërkesë të seleksionuesit të shpresave, shtyhet ndeshja

Dueli i javës së katërt që duhej të luhet këtë fundjavë, Rabotniçki-Shkëndija shtyhet për një termin tjetër shkaku i kërkesës së seleksionuesit të Maqedonisë U21, që nga dy skuadrat ka grumbulluar 6 futbollistë. 

“Rabotniçki-Shkëndija nuk do të luhet në terminin e paraparë të dielën (31.08.2025), pasi Komisioni për Gara pranë FFM-së ka sugjeruar të respektohet kërkesa e seleksionuesit të shpresave të vendit Goran Staniq për ndryshim orari.

Maqedonia U21 nis ciklin kualifikuese për Kampionatin Evropian të vitit 2027 dhe ka ndeshje kundër Polonisë në Krakov dhe Italisë në Manastir. Seleksionuesi ka ftuar 6 futbollistë nga rradhët e dy skuadrave, Shkëndijës (Anes Meliqi dhe Numan Ajeti) dhe Rabotniçkit (4 futbollistë), derisa ka insistuar që të ketë grupin e kompletuar që në start të grumbullimit shkaku i afatit të shkurtër përgatitor dhe rëndësisë së ndeshjeve. 

Kësisoj, ndeshja është shtyrë për një termin tjetër të pacaktuar që do të vendoset në mënyrë plotësuese nga Komesari për Gara pranë FFMV-së. 

Problem shtesë u shfaq edhe fakti që Rabotniçkit i’u ndalua të shfrytëzojë këtë periudhë stadiumin “Todor Proeski”. 
Shkëndija ofroi mundësi të luhet takimi në Tetovë, për ta kompensuar më pas ndeshjen e kthimit në xhiron e 15-të për ta luajtur në Shkup, mirëpo pasi edhe kjo nuk u pranua, zhvendosja e ndeshjes në një termin tjetër ishte e pashmangshme.

Për Shkëndijën, me këto lëvizje gjithsesi se po ngjeshet orari, pasi shkaku ndeshjeve Evropiane, ekipi veçmë pati nevojë për termin shtesë edhe për ndeshjen fazës së parë të Kupës së vendit përballë Yeni Maales, përballje tashmë e caktuar për datën 10 shtator të luhet në Tetovë”, thuhet nga KF Shkëndija.