Tentim*vra:sje në Prizren, plag:oset 29-vjeçari, i dyshuari arrestohet pas ikjes nga vendi i ngjarjes

Një ngjarje e rëndë kriminale ka ndodhur mbrëmë në Prizren, ku një person ka mbetur i plagosur nga arma e zjarrit, ndërsa i dyshuari është arrestuar nga Policia pak pas ngjarjes.

Sinjali mëson se rasti është raportuar rreth orës 17:50 –18:10, kur Policia ka marrë informata për të shtëna me armë në rrugën “Ismet Jashari – Kumanova/Xhavit Bajraktari”. Vetëm pak minuta më pas, rreth orës 18:12, Emergjenca e Spitalit ka njoftuar se një person kishte kërkuar ndihmë mjekësore pas plagosjes.

Viktima është identifikuar si Zejnel Begolli rreth 29-vjeçar i cili ka marrë një plagë në këmbën e majtë. Sipas mjekëve, gjendja e tij është stabile dhe jashtë rrezikut për jetë. Burimet policore bëjnë të ditur se i dyshuari për plagosjen është Vahit Salihu rreth 24-vjeçar. Ai dyshohet se ka shtënë me armë drejt Begollit dhe më pas është larguar nga vendi i ngjarjes me një veturë Opel Corsa, ngjyrë hiri. Rreth orës 19:20, i dyshuari është lokalizuar dhe arrestuar nga Policia. Me urdhër të Prokurorit të Shtetit, rasti është iniciuar si “Vrasje e mbetur në tentativë”, ndërsa hetimet për motivin dhe rrethanat e ngjarjes po vazhdojnë nga Hetimet Rajonale.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.