Inter ka në dispozicion 20 milion euro

Interi e ka mbyllur pjesën hyrëse të merkatos verore, por nuk mund të flitet për një fund të qetë. Drejtori i përgjithshëm Xhuzepe Marota, pas shortit të Ligës së Kampionëve, deklaroi se “merkatoja është bërë” dhe se skuadra është e kompletuar për objektivat që ka përpara. Megjithatë, fjalia e tij nuk përjashton surprizat e minutave të fundit, pasi tregu shpesh ka dhuruar kthesa të papritura.

Në fakt, situata nuk është plotësisht e qartë. Ka disa çështje që lidhen me largimet, si ato të Mehdi Taremit dhe Palaciosit, të cilat mbeten për t’u zgjidhur.

Nëse do të gjendeshin zgjidhje për këto raste, Interi mund të kishte mundësinë të shikonte edhe ndonjë lëvizje të re në hyrje. Sektorët më të ndjeshëm janë ata mbrojtës.

Zikaltrit kanë marrë disa lojtarë me kosto të ulët ose me parametra zero, por nuk është e thënë që të gjitha këto goditje të rezultojnë të suksesshme. Rasti i Palaciosit është një shembull: i ardhur si përforcim falas nga Santos, por pa dhënë garancitë e pritura. Kjo lë të hapur mundësinë që drejtuesit të ndërhyjnë, nëse shfaqet ndonjë mundësi e favorshme në orët e fundit. Për më tepër, ekziston gjithmonë rreziku i ndonjë largimi të bujshëm. Një emër i ndjeshëm është ai i Benxhamin Pavard.

Francezi është një nga pikat e forta të mbrojtjes së Kivut, por zëvendësimi i tij do të ishte i ndërlikuar. Kjo është arsyeja pse drejtuesit e Interit mbajnë gjithmonë ndezur sinjalin e alarmit, edhe pse dëshira është që blloku i skuadrës të ruhet deri në fund. Nga ana financiare, situata duket e favorshme. Interi kishte planifikuar rreth 45 milionë euro për dy objektiva të rëndësishëm si Lukman dhe Kone. Përfundimisht është realizuar vetëm blerja e Diuf, që ka kushtuar 25 milionë.

Kjo do të thotë se në arkat e klubit ka mbetur një shumë e konsiderueshme, një “thesar” prej rreth 20 milionë eurosh. Pyetja është: a do të shpenzohet tani ky buxhet apo do të rezervohet për më vonë? Nga njëra anë, fundi i merkatos mund të sjellë ndonjë rast të volitshëm. Nga ana tjetër, drejtuesit e Interit janë të prirur të shmangin vendimet e ngutshme që shpesh shoqërojnë ditët e fundit të merkatos. Nëse nuk shfaqet një emër i nivelit të lartë, paratë do të ruhen për janarin.

Për më tepër, klubi mendon edhe për të ardhmen afatmesme.

Vera e ardhshme pritet të sjellë një revolucion të vërtetë në skuadër, për shkak të skadimit të disa kontratave të rëndësishme. Emra si Jan Zomer, Francesko Açerbi, Stefan De Vrij, Mateo Darmian dhe Henrikh Mkhitarian janë në listën e lojtarëve që mund të largohen, dhe Inter do të duhet të përgatitet që tani për zëvendësuesit e tyre.

Për këtë arsye, drejtuesit e konsiderojnë të mençur ruajtjen e këtij thesari financiar. Një pjesë e tij mund të përdoret në janar, për të forcuar skuadrën në prag të fazave vendimtare të sezonit, ndërsa pjesa tjetër mund të shërbejë si bazë për rinovimin e madh të verës 2026. Në këtë mënyrë merkatoja e Interit në hyrje duket e mbyllur, por gjithmonë me një pikëpyetje. Sepse futbolli ka treguar se në minutat e fundit mund të ndryshojë gjithçka. Dhe me 20 milionë euro të lira në arkë, Marota dhe Ausilio mund të kenë ende një surprizë në dorë.