Guardiola para sfidës me Brighton-in: Shoh gjëra që më pëlqejnë

Trajneri i Manchester City-t, Pep Guardiola, është shprehur optimist para ndeshjes së sotme në “Falmer Stadium” kundër Brighton-it, pavarësisht humbjes që ‘Qytetarët’ pësuan fundjavën e kaluar ndaj Tottenham-it.

Guardiola u shpreh se ekipi i tij ka treguar shenja pozitive si në stërvitje, ashtu edhe në ndeshjet e zhvilluara në SHBA gjatë verës.

“Pas gjashtë titujve të Premier League në tetë vitet e fundit, gjithmonë e fillojmë sezonin pa e ditur nëse do ta fitojmë sërish. Por unë shoh gjëra që më pëlqejnë, edhe kundër ‘Spurs’.

Normalisht, ka gjëra që mund t’i bëjmë shumë më mirë, por kjo është pjesë e kësaj faze të sezonit,” tha Guardiola.

Tekniku spanjoll shtoi se City nuk duhet të krahasohet me versionet e mëparshme të skuadrës, si “Centurions” apo fitoret e katër titujve radhazi.

“Do të kemi edhe humbje, është normale. Por unë shoh parimet që na kanë bërë të suksesshëm. Kjo nuk garanton tituj, por më jep besim se do të jemi në rrugën e duhur,” theksoi Guardiola.