Nuhiu para ndeshjes me Prishtinën: Tifozët mbështetja jonë më e madhe

Trajneri i Gjilanit, Ardian Nuhiu, është shfaqur para mediave në prag të duelit kampional ndaj FC Prishtina, duke folur në lidhje me përgatitjet e ndeshjes, gjendjen e futbollistëve si dhe startin kampionat.

Ndeshja luhet sot (16.30) në Gjilan.

“Ndeshje e fortë përballë një kundërshtari që vjen me shumë vetëbesim nga ky fillim kampionati. Mirëpo, unë kam besim te skuadra dhe në përgatitjen e ndeshjes të cilën e kemi bërë.

Kërkojmë të jemi të disiplinuar, të qetë kur kemi topin, por dua të jemi të rrezikshëm para portës duke shfrytëzuar çdo mundësi që do të na paraqitet. Kemi respekt ndaj kundërshtarit, por pres që skuadra ime të bëj diferencën”, tha Nuhiu,

Përgjegjësitë e rezultateve?

“Përgjegjësitë gjithmonë i marr unë, asnjëherë nuk kam ikur, apo jam fshehur prapa tyre. Së bashku me presidentin dhe drejtorin kemi ndërtuar një skuadër të fortë, apo një shtëpi, tullë pas tulle, të cilën personalisht e shoh shumë lartë. Në asnjë moment nuk do të kërkojmë arsyetime, por do të kërkojmë rezultate, për të cilat kemi besim shumë të madh që do të vijnë”.

Mbështetja e tifozëve

“Dua ti falënderoj tifozët për mbështetjen e madhe të cilën na kanë dhënë, jo vetëm në këto dy ndeshje, por gjithmonë kanë qenë pranë nesh. Pres që edhe në ndeshjen e nesërme të qëndrojnë pranë skuadrës dhe ta mbështesin, sepse këtë vit do kemi luftëra shumë të forta dhe mbështetja është më se e nevojshme, duke besuar që në fund do të festojmë gjithë së bashku”.

Dëmtimet?!

“Kemi disa shqetësime të vogla dhe atë për shkak të fushës sintetike. Stafi mjekësor është duke qëndruar afër tyre dhe po bëjnë të pamundurën për ti rikuperuar”.

Zgjedhjet për formacion?!

“Vërejtje për shkak të rezultateve, por ne kemi qenë kërkues në dy ndeshjet e para të kampionatit. Nuk lejoj që në skuadër të ketë futbollist të padiciplinuar. Çdo ndeshje diferencat janë të vogla ndërmjet futbollistëve dhe varësisht nga kundërshtari do të përzgjedhim edhe lojtarët të cilët do të startojnë ndeshjen”.

Presioni?

“Presioni më frymëzon për të punuar edhe më tepër. Kam mbështetjen e presidentit dhe drejtuesve. Por, më e rëndësishmja është mbështetja dhe përcjellja e futbollistëve në punën tonë. Jemi në rrugën e duhur në të cilën besojmë shumë dhe nuk ka mundësi që të mungoj suksesi”.

Mesazhi?

“Sfidë të cilën dua që çdo njëri ta shfrytëzoj mundësinë për ti rritur vlerat e tyre duke luftuar dhe duke sakrifikuar për të arritur te suksesi”.