Ronaldo Websterin dhe Nazif Cekën, 6 kuqezinj të Shkëndijes me kombëtare

Xhamajkani, Webster dhe mbrojtësi i ri Ceka çojnë në 6 numrin e futbollistëve të Shkëndijës që grumbullohet në këtë pauzë ndërkombëtare, pas R. Ramadanit, Gayes, Meliqit e Ajetit.

“Kuqezinjtë vazhdojnë të jenë prezentë në ekipet kombëtare, këtë herë me plot 6 futbollistë të ftuar nga përfaqësueset respektive për ndeshjet e shtatorit.

Pas Reshat Ramadanit, Baboucar Gayes, Anes Meliqit dhe Numan Ajetit, ftesa kanë mbërritur edhe për Nazif Cekën dhe Ronaldo Websterin.

Ronaldo Webster, është ftuar nga kombëtarja e Xhamajkës për ndeshjet kualifikuese të Kupës së Botës. Xhamajkanët do të përballen me Bermuda-n më 5 shtator (në Bermuda) dhe me Trinidad & Tobago më 9 shtator (në Kingston, Xhamajkë). Webster duhet të jetë në dispozicion të kombëtares së tij nga 1 deri më 10 shtator.

Nazif Ceka, mbrojtësi i ri kuqezi, i rritur te shkolla e futbollit Shkëndija dhe i nënshkruar këtë verë me kontratën e parë profesionale, është ftuar nga përfaqësuesja U19 e Maqedonisë së Veriut për dy miqësoret kundër Bosnjë e Hercegovinës (4 shtator në Radovish dhe 6 shtator në Strumicë).

Ceka tashmë ka debutuar me ekipin e parë në ndeshjen hapëse të sezonit kundër Shkupit (5:1 në Tetovë) dhe pritet të marrë minuta edhe me fanellën e përfaqësueses U19.

Kujtojmë se në këtë pauzë ndërkombëtare, përveç Cekës dhe Websterit, me ekipet përfaqësuese do të jenë edhe:

Reshat Ramadani – përfaqësuesja A e Maqedonisë së Veriut
Baboucarr Gaye – përfaqësuesja e Gambias

Anes Meliqi & Numan Ajeti – përfaqësuesja U21 e Maqedonisë së Veriut
Shkëndija u uron shumë suksese të gjashtë futbollistëve në angazhimet ndërkombëtare dhe pret t’i shohë të kthehen me përvojë dhe motivim shtesë për vazhdimin e sezonit me fanellën kuqezi”, njofton Shkëndija.