Ten Hag ka një mesazh të fortë

Erik Ten Hag ka shprehur habinë e tij të plotë pas shkarkimit nga Bayer Leverkusen, me ish-trajnerin e Manchester United që zgjati vetëm dy ndeshje kampionale në krye të skuadrës. 

Trajneri holandez, i cili u shkarkua nga detyra te Manchester United në tetor të vitit 2024, pavarësisht fitimit të Carabao Cup dhe FA Cup, mori drejtimin e Leverkusen më 1 korrik, duke zëvendësuar Xabi Alonson që u transferua te Real Madrid. 

Kontrata e tij dyvjeçare u ndërpre më 1 shtator, vetëm pas tre ndeshjesh në drejtim të skuadrës, një fitore në Kupën e Gjermanisë ndaj skuadrës modeste SG Sonnenhof Grossaspach, një humbje 2-1 nga Hoffenheim dhe një barazim dramatik 3-3 ndaj Werder Bremen. 

“Vendimi i menaxhmentit të Bayer Leverkusen këtë mëngjes për të më larguar nga detyra erdhi si një surprizë e plotë. Të ndahesh nga një trajner pas vetëm dy ndeshjesh kampionale është diçka e paprecedentë”. 

“Këtë verë, shumë lojtarë kyç që ishin pjesë e sukseseve të kaluara u larguan nga skuadra. Ndërtimi i një ekipi të ri dhe të bashkuar është një proces i kujdesshëm që kërkon kohë dhe besim”. 

“Një trajner i ri meriton hapësirë për të zbatuar vizionin e tij, për të vendosur standardet, për të formuar skuadrën dhe për të lënë gjurmë në stilin e lojës”. 

“E nisa këtë detyrë me bindje dhe energji të plotë, por fatkeqësisht drejtuesit nuk ishin të gatshëm të më jepnin kohën dhe besimin që më nevojitej, gjë që më vjen thellësisht keq”.

“E ndjej se kjo nuk ishte kurrë një marrëdhënie e bazuar në besim të ndërsjellë”, përfundoi holandezi./Telegrafi