Vllaznia kthehet në fushë

Ditën e mërkurë pasdite, skuadra e Vllaznisë është rikthyer në fushën stërvitore pas 2 ditësh pushim.

Ku shkodranët shijuan të lirë këtë fillim jave, për t’u kthyer tashmë sërish nën urdhrat e trajnerit Martini dhe stafit të tij.

Pavarësisht humbjes së fundit ndaj Dinamos në shifrat 3- 1, humori dhe gjendja psikologjike në kampin kuqeblu ka qenë shumë pozitive. Me futbollistët shkodranë që janë parë në një atmosferë pozitive, duke mos i ndikuar aspak nga disfata e fundit. Kjo edhe për shkak se mbi skuadrën momentalisht nuk ekziston asnjë presion dhe pritet vetëm konfigurimi dhe ardhja në formë e gjithë grupit.

Për t’u rikthyer tek stërvitja, ajo nuk ka qenë e një ritmi shumë të lartë dhe futbollistët më së shumti kanë zhvilluar disa vrapime të lehte dhe lojëra brenda grupit. Në mënyrë që ngarkesa fizike të mos jetë shumë e lartë dhe lojtarët të mos mbingarkohen, duke qenë se edhe kampionati do jetë pushim gjatë kësaj fundjave në Superiore. Për t’u shtuar është fakti se grupi ka qenë i plotë, me asnjë prej futbollistëve të 9 herë kampionëve të vendit që vuan ndonjë dëmtim apo ndalesë në infermieri.

Kjo patjetër kënaq Martinin, që do kërkojë arritjen e formës fizike nga të gjithë në këto ditë. Në mënyrë që gjithë futbollistët të jenë të gatshëm të japin kontributin e tyre në momentin që skuadra do rikthehet në aktivitet. Ku kurioziteti është ende shumë i madh për të shikuar disa nga të afruarit e kësaj vere në maksimumin e formës së tyre sportive dhe fizike.