Talent i West Ham: Largimi nga Chelsea ishte gjëja më e mirë që më ndodhi

Preston Fearon, anësori 18-vjeçar i West Ham, vlerësohet nga lojtarët e ekipit të parë si një nga talentet më premtuese për këtë sezon.

I rritur te akademia e Chelsea-s, ku u bashkua që në moshën 8-vjeçare, ai u largua nga klubi në nivelin U14 pas shtatë vitesh në Cobham.

Por për Fearon, ajo që në fillim dukej si një zhgënjim, sot shihet si një bekim.

“Isha te Chelsea që nga U8, kështu që pas shtatë a tetë vitesh, largimi ishte shumë i vështirë.

Por babai im thotë tani se ishte gjëja më e mirë që më ka ndodhur.

Te West Ham ndjeva menjëherë një atmosferë familjare, trajtim më të mirë dhe nuk kisha asnjë dyshim për firmën,” tha talenti i ri.

Në sezonin e parë me Hammers, ai fitoi Floodlit Shield, u përshtat shpejt me skuadrën dhe siguroi vend në formacionin titullar.

“Drejt fundit të sezonit stërvitesha shpesh me ekipin e parë dhe, pavarësisht një lëndimi që më ndërpreu ritmin, këtë verë jam rikthyer më fort. Çdo gjë po ndodh shumë shpejt dhe është një përvojë e mahnitshme. Jam shumë i emocionuar për sezonin që vjen”, theksoi ai.