Rusia refuzon të komentojë incidentin me dron në Poloni

Zëdhënësi i Kremlinit Dmitry Peskov refuzoi sot të komentojë akuzat e Polonisë për një sulm me dron nga Rusia.

Ai në një konferencë për media në Moskë, tha se çështja është brenda fushëveprimit të Ministrisë së Mbrojtjes dhe nëse do të lëshohej ndonjë koment zyrtar mbi incidentin, ai do të vinte nga shërbimi ushtarak, raporton KosovaPress.

"Ne nuk do të donim të komentonim për këtë në asnjë mënyrë. Kjo nuk është fusha jonë e ekspertizës. Kjo është prerogativë e Ministrisë së Mbrojtjes", tha ai.

I pyetur nëse udhëheqja polake kërkoi ndonjë kontakt pas incidentit, Peskov tha se nuk kishte marrë asnjë kërkesë të tillë nga Kremlini.

"Udhëheqësit e BE-së dhe NATO-s akuzojnë Rusinë për provokime çdo ditë. Shumicën e kohës, pa u kujdesur as të paraqesë të paktën një lloj argumenti", tha ai.

Kryeministri polak Donald Tusk tha sot se rreth dhjetë dronë u rrëzuan mbi Poloni mbrëmë dhe i referoi ato si "ruse".

Duke iu referuar planeve të "koalicionit të të gatshmëve" për të vendosur kontingjente ushtarake në Ukrainë, Peskov paralajmëroi se dërgimi i çdo trupe të huaj në Ukrainë mund të çojë në pasoja të tmerrshme, por jo të gjitha vendet perëndimore duket se e kuptojnë këtë realitet.

"Gjithmonë ka vende që mbajnë një qëndrim ekstremist, duke dështuar ose duke refuzuar të kuptojnë implikimet e tmerrshme të veprimeve të tilla të pamatura. Dhe ka vende të tjera që e kuptojnë shumë më mirë situatën aktuale", tha ai, transmeton Anadollu.