Aksion në Prizren, kapen pesë të dyshuar për drogë: Sekuestrohen doza marihuane, para e telefona

Një tjetër rast i shpërndarjes së narkotikëve është zbuluar mbrëmë në Prizren, ku pesë persona janë arrestuar dhe u janë sekuestruar substanca narkotike, telefona e para, mëson ekskluzivisht Gazeta Sinjali.

Burimet e Sinjalit bëjnë me dije se rasti ka ndodhur më 21 shtator 2025, rreth orës 20:15, në rrugën “Marije Kraja”, ku patrulla policore ka vërejtur të dyshuarit që lëviznin tinëzisht. Njëri prej tyre ka tentuar të fshehë një shishe plastike, por policia e ka gjetur dhe ka sekuestruar aty katër doza marihuanë me peshë 5.98 gramë.

Gjatë kontrollit të automjetit VW Golf 5 ngjyrë të zezë, në pronësi të të dyshuarit, është gjetur edhe një sasi tjetër marihuane me peshë 0.53 gramë. Ndërkohë, në një automjet tjetër, Opel Corsa D, të shfrytëzuar nga i dyshuari tjetër, policia ka zbuluar dhe sekuestruar 16 qese me marihuanë, me peshë totale 29.18 gramë.

Në vazhdim, me urdhër të prokurorit të Krimeve të Rënda, është kontrolluar edhe banesa e njërit nga të dyshuarit në rrugën “Villiam Voker”, por aty nuk është gjetur asgjë e dyshuar. Megjithatë, si dëshmi janë sekuestruar përkohësisht: Pesë telefona mobilë, Një veturë, 30 euro para të gatshme.

Të gjithë të dyshuarit, përfshirë Emir B. rreth 19-vjeçar, Edis O. rreth 29-vjeçar, Orhan S. rreth 28-vjeçar, Arnel A. rreth 29-vjeçar dhe Amil K. rreth 26-vjeçar, janë shoqëruar në stacion policor dhe janë intervistuar në prani të hetuesve të Njësisë për Narkotikë në Prizren.

Me vendim të prokurorit, katër prej tyre janë liruar në procedurë të rregullt, ndërsa i dyshuari kryesor, Emir B., është ndaluar për 48 orë dhe dërguar në qendrën e ndalimit.

Hetimet për rastin po i zhvillon DHTN – Njësia në Prizren.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.