Monza po hap një epokë të re

Monza po hap një epokë të re, duke mbyllur përfundimisht kapitullin “Berlusconi” në futboll pas gati 40 vitesh. Familja largohet nga skena dhe klubin e merr fondi amerikan “Beckett Layne Ventures”, i drejtuar nga menaxheri i marketingut Brandon Berger.

Operacioni vlen rreth 30 milionë euro dhe shënon një moment historik për klubin që, nën drejtimin e Silvio Berlusconit dhe Adriano Gallianit, u ngjit për herë të parë në Serie A.

Shitja e klubit pritet brenda orëve të ardhshme, konfirmohet edhe nga Komuna e Monzës. Është krijuar një strukturë ekonomike italiane që do të shërbejë si garanci për pronarët e rinj. Fillimisht, bordi drejtues do të jetë italian, por në të ardhmen Berger pritet të bëhet president, me Mauro Baldissoni si administrator.

Financiarisht, fondi ka paguar tashmë 3 milionë euro për 10% të aksioneve.

Me marrëveshjen përfundimtare do të shtohen 21 milionë të tjera për të arritur 80%. “Fininvest” do të mbajë 20% deri në qershor 2026. Objektivi i pronarëve të rinj është konsolidimi i Monzës, kthimi në Serie A dhe rritja ndërkombëtare.