FIFA prezanton maskotat e Botërorit 2026

FIFA ka zbuluar maskotat zyrtare të Kampionatit Botëror 2026, turne i cili do të zhvillohet në SHBA, Kanada dhe Meksikë.

Tri figurat simbolike – Clutch (shqiponja qerose), Maple (dreri) dhe Zayu (leopardi) – përfaqësojnë kulturën dhe shpirtin e secilit vend mikpritës.

“Maple, Zayu dhe Clutch janë plot gëzim, energji dhe bashkëpunim, njësoj si vetë Kupa e Botës FIFA”, deklaroi presidenti Gianni Infantino gjatë prezantimit.

Çfarë përfaqëson secila maskotë?

Maple, dreri kanadez, simbolizon udhëtimin dhe lidhjen me njerëzit në çdo krahinë të Kanadasë, duke përqafuar kulturën e saj të pasur. Në lojë, ai është portier.

Zayu, leopardi i gjallë nga xhunglat e Meksikës, mishëron traditat, ushqimin dhe kërcimin e kulturës meksikane. Ai luan si sulmues.

Clutch, shqiponja qerose amerikane, është mesfushor dhe përfaqëson kureshtjen, optimizmin dhe përfshirjen e kulturave të ndryshme që bashkohen në SHBA.

Sipas FIFA-s, këto maskota janë më shumë se thjesht personazhe: ato simbolizojnë unitetin, diversitetin dhe pasionin e përbashkët për futbollin.

Botërori 2026, një turne historik

Turneu i vitit të ardhshëm do të jetë i pari me 48 ekipe kombëtare, duke sjellë gjithsej 104 ndeshje.

Ndeshja hapëse do të zhvillohet më 11 qershor në Estadio Azteca, Mexico City.

Finalja do të luhet më 19 korrik në MetLife Stadium, Nju-Xhersi.

Për herë të parë, gjatë finales do të mbahet edhe një koncert në pushimin mes dy pjesëve.