Boca Juniors në ankth për trajnerin

Boca Juniors po kalon momente të vështira jashtë fushës për shkak të gjendjes shëndetësore të trajnerit Miguel Ángel Russo, i cili po përballet me probleme serioze shëndetësore, ende të paspecifikuara nga klubi.

Në një njoftim zyrtar në faqen e saj, skuadra argjentinase bëri të ditur se “trajneri është aktualisht nën kujdes mjekësor të vazhdueshëm dhe po trajtohet në shtëpi, me prognozë të rezervuar”, duke shtuar se “klubi është pranë Miguelit dhe familjes së tij në këtë moment të vështirë”.

Russo, 69 vjeç, është kthyer për herë të tretë në stolin e Boca Juniors dhe njihet si një nga figurat më të dashura në historinë e klubit. Fitorja e fundit 5-0 ndaj Newell’s Old Boys iu dedikua atij nga futbollistët.

Në mungesë të tij, skuadrën e ka drejtuar ndihmësi Claudio Ubeda, i cili pas ndeshjes u shpreh:

“Jemi në kontakt të vazhdueshëm me Miguelin. Ai është i informuar për çdo vendim të klubit. E duam shumë dhe i urojmë shërim të shpejtë”.

Sipas medieve argjentinase, ditët e fundit Russo ka marrë vizitën e presidentit të klubit Juan Román Riquelme dhe disa prej lojtarëve të ekipit, të cilët i kanë shprehur mbështetjen dhe dashurinë e tyre në këto momente të vështira.