Huijsen largohet nga grumbullimi

Mbrojtësi i Real Madridit, Dean Huijsen, është larguar nga grumbullimi i Kombëtares së Spanjës për shkak të një dëmtimi muskulor.

Në vend të tij, trajneri De la Fuente ka thirrur Laporten, që kthehet në Kombëtare pas pothuajse një viti, për të mbuluar mungesën e mbrojtësit.

Kjo mungesë e Huijsen vjen pas atyre të Lamine dhe Rodrit.

Arsyeja e largimit të qendërmbrojtësit të Real Madrid është lodhja muskulore. Ai nuk stërvitej që nga e martja e kaluar në ‘Ciudad del Fútbol të Las Rozas’ dhe sot i janë kryer testet mjekësore që kanë konfirmuar dëmtimin.

Ekipi i Madridit tashmë e njeh situatën e Huijsen, i cili do të ekzaminohet nga mjekët e klubit sapo të rikthehet në disiplinën e trajnerit Xabi Alonso, për të përcaktuar saktësisht shkallën e dëmtimit.

Laporte, nga ana tjetër, rikthehet në Kombëtare pas një mungese prej gati një viti. Ai nuk ka luajtur për Spanjën që nga ndeshjet e Nations League në nëntor 2024.

Federata e ka njoftuar kështu:

“Dean Huijsen largohet nga grumbullimi i Kombëtares për shkak të një dëmtimi muskulor para ndeshjeve të kualifikimeve për Botërorin 2026, kundër Gjeorgjisë në Elche dhe Bullgarisë në Valladolid.

Mbrojtësi i Real Madrid mbërriti në grumbullim të hënën në mbrëmje me simptoma lodhjeje muskulore.

Të martën nuk stërvitej dhe klubi i tij u njoftua se zhvillimi nuk ishte pozitiv, prandaj sot, të mërkurën, iu krye një ekzaminim mjekësor që konfirmoi dëmtimin. Real Madrid është informuar dhe Huijsen largohet nga grumbullimi, duke i uruar shërim të shpejtë.”