Inigo Martinez: Edhe pse jam pro pavarësisë së Katalonisë, nuk do të thotë që nuk duhet të luajë për Spanjën

Ish-mbrojtësi i Real Sociedadit, Athletic Club dhe Barcelonas, Iñigo Martínez, ka folur për mungesën e tij te kombëtarja spanjolle dhe vendimin për t’u tërhequr nga ekipi në mars.

Mbrojtësi 34-vjeçar ishte përfshirë nga Luis de la Fuente për çerekfinalet e Ligës së Kombeve kundër Holandës, por u tërhoq për shkak të dhimbjeve në gju – vendim për të cilin disa e kritikuan.

Qendërmbrojtësi bask ishte një nga liderët e mbrojtjes së Barcelonës sezonin e kaluar, mbrojtje që është përballur me vështirësi pa të këtë sezon.

Megjithatë, Martínez i tha “Cadena Cope” se është i bindur që Barcelona do të luftojë për titullin deri në javët e fundit të kampionatit. Ai shtoi se nuk ka arsye për panik pas humbjes nga Paris Saint-Germain.

“Pjesa e dytë nuk ishte e mirë, por po flasim për PSG-në. Luis Enrique e njeh shumë mirë Barcelonën dhe ata kanë një skuadër të madhe.

Është normale të kesh ndeshje ku vuan më shumë, dhe gjëja e rëndësishme është të reagosh kur ekipi nuk po kalon momentin më të mirë. Vitin e kaluar patëm një rënie, mjaft të madhe, por arritëm ta kalonim”, tha ai.

Megjithëse ka luajtur 21 ndeshje me Spanjën, disa sugjeruan se Martínez ishte tërhequr nga kombëtarja sepse nuk donte të luante më për “La Roja”.

“Nëse nuk doja të shkoja, do të isha i pari që do ta thosha. Nuk do të humbja kohën time… Thjesht ka pasur situata kur jam ndier më mirë ose më keq. Në atë kohë, me dëmtimin apo shqetësimin në gju, mendova: ‘Nuk është e mundur të shkoj me kombëtaren,’ siç ndodh edhe me lojtarë të tjerë.

Pastaj situata ime u rishikua, ishte e qartë që kisha shqetësime, dhe… ditët kaluan, gjuri u përmirësua. Dhe lojtarët nuk luajnë gjithmonë 100%. Ekzistonte rreziku i një dëmtimi ose i përkeqësimit, të cilin e vlerëson në atë moment. Nuk mendoj se ky është rasti i parë, as i fundit”, shtoi ai.

Në majin e kaluar, Martínez u pa duke festuar tripletën vendase të Barcelonës, i mbështjellë me flamurin bask (Ikurrina) dhe duke valëvitur më pas flamurin katalanas (Estelada), simbol i lëvizjes për pavarësi.

“Është një gjë të jesh në favor të asaj që mendon shumica e një populli… Por kjo nuk do të thotë që, nëse jam pro pavarësisë apo i mbështes në shumë çështje, nuk duhet të luaj për kombëtaren. Nuk është kështu. Njerëzit i lidhin këto dy gjëra vetëm sepse jam bask”, tha ai më tutje.

Martínez shtoi se do ta mbështesë Spanjën në Kupën e Botës vitin e ardhshëm në SHBA, Meksikë dhe Kanada, edhe pse vetë nuk pritet të jetë pjesë e ekipit.

“Tani për tani, Spanja. Nëse nuk doja të shkoja, nuk do të kisha shkuar… Fola me trajnerin… dhe mendoj se, në këtë pikë, nuk do të ishte ide e mirë të kthehem në skuadër. Kush nuk do të donte të luante në një Kupë Bote? Trajneri e dinte tashmë këtë. Nuk mendoj se duhet t’i shpjegohem askujt tjetër, vetëm trajnerit, dhe kaq. Dhe u mor vendimi që të mos shkoja, njësoj siç u mor vendimi për të rikthyer Ferranin”, bëri me dije ai.

Çështja e pavarësisë së Katalonisë ka qenë shpesh burim përçarjeje në kombëtaren spanjolle.

Rasti më i famshëm është ai i Gerard Piqué, i cili u fishkëllente nga tifozët e Spanjës në vitet e fundit të karrierës së tij me La Roja, pasi kishte deklaruar se ishte në favor të një referendumi për pavarësinë e Katalonisë, megjithëse nuk ka zbuluar kurrë se në cilën mënyrë do të kishte votuar.