PSG shpëton me vështirësi në një barazim

Paris Saint-Germain shmangu humbjen në një ndeshje dramatike ndaj Strasburgut, e cila përfundoi me rezultatin 3:3 në “Parc des Princes”, pas një përmbysjeje dhe një rikthimi të dytë emocionues.

Sfida nisi me golin e hershëm të Bradley Barcola, pas një kombinimi të shkëlqyer me Désiré Doué në minutën e gjashtë.

Megjithatë, Strasburgu reagoi fuqishëm: Joaquín Panichelli barazoi me një goditje të saktë me kokë në minutën e 26-të, ndërsa Diego Moreira përfitoi nga një gabim i Doué për të përmbysur rezultatin para pushimit.

Në pjesën e dytë, francezët e Luis Enrique u tronditën sërish, pasi Panichelli shënoi golin e tij të dytë, duke e çuar Strasburgun në 3-1. Por PSG nuk u dorëzua.

Një penallti e fituar nga Doué dhe e realizuar nga Gonçalo Ramos ngushtoi diferencën, duke ringjallur shpresat e vendasve.

Presioni i kryeqytetasve u shpërblye në minutat e fundit, kur Senny Mayulu realizoi golin e barazimit pas një goditjeje me kokë, duke shpëtuar PSG-në nga një humbje e turpshme në shtëpi.

Në fund, të dyja skuadrat kërkuan golin e fitores, por mungesa e saktësisë për Kvaratskhelia dhe Panichelli bëri që rezultati të mbetej i pandryshuar.

Kjo është hera e parë që PSG humb pikë në “Parc des Princes” që prej prillit, ndërsa Strasburgu i Liam Rosenior konfirmoi edhe njëherë statusin e tij si një nga skuadrat më tërheqëse të Evropës.