Rafael Benitez afër të nënshkruajë me klubin grek

Ish-trajneri i Premierligës, Rafael Benítez, raportohet se është shumë pranë marrjes së drejtimit të një klubi europian.

Benítez, 65 vjeç, ka pasur një karrierë të gjatë si trajner, duke nisur punën e tij të parë në vitin 1986, kur mori drejtimin e ekipit U17 të Real Madridit.

Që atëherë, ai ka drejtuar disa nga klubet më të njohura europiane – përfshirë Valencian, Napolin, Interin dhe Real Madridin – si dhe ka lënë gjurmë të forta në Premierligë gjatë periudhës së tij me Liverpoolin midis viteve 2004 dhe 2010.

Spanjolli udhëhoqi “The Reds” drejt një triumfi historik në Ligën e Kampionëve kundër Milanit në Stamboll në vitin 2005, përpara se të fitonte Kupën FA ndaj West Ham United një vit më vonë.

65-vjeçari më vonë mori drejtimin e Chelseat si trajner i përkohshëm gjatë sezonit 2012/13, dhe megjithëse nuk arriti të fitonte zemrat e tifozëve të “Stamford Bridge”, ai gjithsesi e udhëhoqi klubin londinez drejt suksesit në Ligën e Europës.

Në vitin 2016, Benítez u bashkua me Newcastle United, ku fitoi respektin e tifozëve për tre vite, por e njëjta gjë nuk mund të thuhet për periudhën e tij te rivalët e Liverpoolit, Everton, gjatë sezonit 2021–22.

Disa tifozë të Liverpoolit madje e tallën duke thënë se Benítez ishte bashkuar me Evertonin si “agjent i fshehtë” me qëllim për t’i çuar drejt rënies nga kategoria.

Pavarësisht shtatë muajve të vështirë tek Everton, dëshira e tij për të trajnuar mbeti e fortë.

Në vitin 2023, ai mori drejtimin e klubit spanjoll Celta Vigo, por qëndroi vetëm tetë muaj në detyrë.

Që prej asaj kohe, ai nuk ka pasur një rol të ri menaxherial, megjithatë ka shprehur hapur dëshirën për t’u rikthyer në trajnim “veçanërisht në Angli”, gjatë një interviste për “The Telegraph” në shtator.

Ai deklaroi: “Nuk dua që njerëzit të mendojnë se jam mbaruar. Unë ende po evoluoj.
Është keq për një trajner të shihet si i dalë në pension. Njerëzit ende më pyesin: ‘A dëshiron të trajnosh?’ Sigurisht që po, veçanërisht në Angli dhe Europë”.

Dhe duket se dëshira e Benítez mund të bëhet realitet, pasi raportimet nga Greqia sugjerojnë se ai është pranë një marrëveshjeje me Panathinaikosin.

Sipas “SPORT24”, ish-trajneri i Liverpoolit është shumë afër një akordi me klubin e Athinës dhe pritet të nënshkruajë një kontratë dy vjeç e gjysmë që do ta mbajë në Greqi deri në verën e vitit 2028.

Raportimi gjithashtu pretendon se kontrata e tij do të vlejë 4.35 milionë paund në vit.

Panathinaikos ka fituar Superligën Greke 20 herë, numri i dytë më i madh pas kampionëve aktualë Olympiacos, që kanë 48 tituj.

Megjithatë, Panathinaikos nuk ka fituar kampionatin grek që nga viti 2010.