“Orban ka marrëdhënie të ngrohtë me Trump”, Kremlini shpjegon pse Putin zgjodhi Budapestin për samitin me presidentin e SHBA-ve

Hungaria u zgjodh për të pritur samitin e ardhshëm midis presidentit rus Vladimir Putin dhe presidentit të SHBA-së Donald Trump sepse të dy udhëheqësit mbajnë lidhje miqësore me kryeministrin hungarez Viktor Orban, tha të hënën zëdhënësi i Kremlinit Dmitry Peskov.

Vendimi për vendin e takimit u njoftua të enjten e kaluar pas një bisede telefonike midis Putinit dhe Trumpit. Takimi i tyre i mëparshëm ballë për ballë u zhvillua në Alaska në gusht.

“Orban ka një marrëdhënie të ngrohtë me Presidentin Trump dhe një marrëdhënie konstruktive me Presidentin Putin”, tha Peskov, duke shpjeguar arsyetimin për zgjedhjen e Budapestit. Ai shtoi se përgatitjet janë duke vazhduar për axhendën e samitit, duke përfshirë dokumentet e mundshme që do të nënshkruhen nga të dy presidentët.

Peskov nuk pranoi të komentojë nëse Ukraina apo Bashkimi Evropian do të përfaqësoheshin në ndonjë formë, por tha se qëndrimi i Kievit “mbetet kontradiktor” dhe nuk kontribuon në përpjekjet për paqe.

Orban, i cili e ka mbështetur prej kohësh Trumpin, tha se gatishmëria e tij për të pritur samitin pasqyron qëndrimin e pavarur të Hungarisë brenda BE-së. “Ne jemi të vetmit në Evropë që mbështesim paqen”, deklaroi ai, duke iu referuar kundërshtimit të tij ndaj ndihmës së vazhdueshme ushtarake për Kievin.