Drita - Omonia, ‘intelektualët’ kërkojnë tri pikët në shtëpi, qipriotët pikët e para

Drita do të presë Omonia Nicosia-n në Fadil Vokrri (18:45), në ndeshjen e dytë të fazës së grupeve në UEFA Conference League, me të dyja skuadrat që kërkojnë fitoren e parë në këtë edicion.

Kampionët e Kosovës debutuan me një barazim 1-1 në fushën e KuPS-it në Finlandë, duke reaguar pas disavantazhit fillestar.

Forma e skuadrës së Dritës është në rritje, pasi ka pësuar vetëm një humbje në gjashtë ndeshjet e fundit në të gjitha garat (4 fitore, 1 barazim) dhe vjen nga dy fitore radhazi në kampionat me rezultatin 2-1. Megjithatë, mbrojtja mbetet problem, pasi skuadra nuk ka arritur të ruajë portën të paprekur në nëntë ndeshjet e fundit.

Nga ana tjetër, Omonia po kalon gjithashtu një periudhë pozitive, me vetëm një humbje në shtatë takimet e fundit (5 fitore, 1 barazim). Fitorja 2-1 në kampionatin qipriot e fundjavës i ka dhënë moral, edhe pse disfata 0-1 ndaj Mainz në hapjen e fazës së grupeve ka lënë një shije të hidhur.

Në total, Omonia ka fituar vetëm një nga tetë ndeshjet e fundit në fazën kryesore të Conference League (2 barazime, 5 humbje) dhe nuk ka arritur fitore në katër transfertat e fundit në këtë garë.

Kjo do të jetë përballja e parë në histori mes Dritës dhe Omonias. Statistikat flasin për ndeshje me gola: në pesë nga gjashtë ndeshjet e fundit në shtëpi të Dritës kanë shënuar të dyja skuadrat, ndërsa në 11 nga 13 transfertat e fundit të Omonias janë regjistruar mbi 2.5 gola.

Për Dritën, lojtari për t’u vëzhguar është Albert Dabiqaj, autor i golit ndaj KuPS-it dhe fatsjellës i skuadrës në çdo ndeshje ku ka shënuar (9 fitore, 2 barazime).

Omonia mbështetet te Stevan Jovetić, që ka tetë kontribute në gola në këtë edicion. Mesa dhe Krasniqi mungojnë për Dritën, ndërsa Carel Eiting mbetet jashtë për Omonian.