OKB: Rusia po përdor dronë për të frikësuar civilët në Ukrainë!

Rusia po përdor dronë për të ndjekur dhe sulmuar civilët që jetojnë pranë vijës së frontit në Ukrainë, duke i detyruar të largohen nga shtëpitë e tyre dhe duke shkaktuar zhvendosje masive të popullsisë, një veprim që përbën krim kundër njerëzimit, sipas një raporti të Kombeve të Bashkuara.

Raporti 17-faqësh i Komisionit të Pavarur Hetimor Ndërkombëtar për Ukrainën, i cili pritet të prezantohet këtë javë në Asamblenë e Përgjithshme të OKB-së, përshkruan raste ku civilë janë ndjekur për kilometra të tëra nga dronë të pajisur me kamera, dhe në disa raste janë sulmuar me koktej molotovi apo eksplozivë ndërsa përpiqeshin të strehoheshin.

“Sulmet janë pjesë e një politike të qëllimshme për dëbimin e civilëve nga këto zona dhe përbëjnë krimin kundër njerëzimit të zhvendosjes së dhunshme,” thuhet në raport.

Hetimi bazohet në 226 intervista me viktima, dëshmitarë, punonjës të organizatave humanitare dhe autoritete lokale, si edhe në qindra video të verifikuara nga burime online.

Sipas raportit, sulmet e dokumentuara kanë ndodhur në tre rajone të Ukrainës jugore, pranë vijës së frontit dhe përgjatë lumit Dnieper, gjatë një periudhe që zgjat më shumë se një vit.

Në një nga rastet e cituara, një grua nga Kherson u ndoq nga një dron në gusht 2024 ndërsa parkonte makinën dhe u plagos teksa përpiqej të fshihej në garazh. Po atë ditë, dy dronë të tjerë goditën shtëpinë e saj, duke e detyruar ta braktiste përfundimisht.

Raporti thekson se sulmet me dronë kanë shkaktuar ulje dramatike të popullsisë në disa zona, ku tashmë jetojnë kryesisht të moshuar dhe persona me aftësi të kufizuara.

“Nuk ka asnjë dyshim se operatorët e dronëve veprojnë me qëllim,” deklaroi për Reuters Eric Møse, kryetar i komisionit hetimor të OKB-së. “Ata ndjekin njerëzit në oborret e tyre, në shtëpitë e tyre apo edhe në rrugë,” shtoi ai.

Disa nga të mbijetuarit që folën me hetuesit thanë se ndiheshin “të gjuajtur”, ndërsa sipas Møse, edhe vetë autorët përdorin këtë term në videot e publikuara nga dronët e tyre në internet.

Edhe zjarrfikës, mjekë dhe ekipe emergjence janë bërë objekt sulmesh, duke u mohuar banorëve ndihmën bazë në zonat më të prekura, sipas raportit.

Komisioni i OKB-së kishte deklaruar më herët, në maj, se këto sulme përbëjnë krim kundër njerëzimit për vrasje. Në raportin e ri theksohet se ato përbëjnë gjithashtu zhvendosje të dhunshme të popullsisë, duke u shtrirë në një zonë mbi 300 kilometra të gjerë.

Dokumenti përmend gjithashtu se autoritetet ruse kanë koordinuar dëbimin dhe transferimin e civilëve nga zonat e Zaporizhias që ndodhen nën kontrollin e tyre – një veprim që, sipas OKB-së, përbën krim lufte.