PSG synon t’i rrëmbejë talentin e La Masia-s

Paris Saint-Germain duket se është gati të sulmojë sërish “thesarin” e akademisë së Barcelonës, La Masia.

Pas një historie të gjatë transferimesh nga klubi katalanas, francezët kanë vënë tani në shënjestër Juan Hernandez, një mesfushor premtues 18-vjeçar që aktivizohet me Barça Atlètic, skuadra e dytë e Barcelonës, nën drejtimin e Juliano Belletti-t.

PSG ka marrë shpesh lojtarë nga Barcelona në vitet e fundit. Operacioni më i bujshëm mbetet ai i Neymar-it në vitin 2017 për 222 milionë euro, por edhe emra si Kays Ruiz-Atil, Rafinha, Xavi Simons dhe më vonë Arnau Tenas kanë kaluar në Paris në kuadër të projekteve afatgjata.

Megjithatë, asnjëri prej tyre nuk ka arritur të bëhet pjesë e qëndrueshme e formacionit kryesor, përjashto Lionel Mess-in dhe Ousmane Dembélé-në, të cilët kanë lënë gjurmë të dukshme në kryeqytetin francez.

Trajneri Luis Enrique, ish-teknik i Barcelonës dhe aktualisht në krye të PSG-së, vazhdon të ndjekë me kujdes prurjet e reja të klubit katalanas. Pas interesimit për Eric Garcia, tani në listën e tij është shtuar edhe Juan Hernandez, një lojtar me teknikë të lartë dhe aftësi për të luajtur në disa pozicione të mesfushës, tipar që Enrique e vlerëson shumë.

Hernandez është pjesë e La Masia-s që nga viti 2022 dhe sezonin e kaluar ka luajtur 10 ndeshje në Youth League, duke shënuar 2 gola. Ai është gjithashtu pjesëtar i rregullt i përfaqësueseve të moshave të Spanjës, nga U-15 deri te U-19.

Kontrata e tij me Barcelonën skadon në qershor 2026, por një klauzolë lirimi prej vetëm 7 milionë eurosh dhe mundësia për ta marrë me parametër zero mund ta tundonin PSG-në për një tjetër “goditje” nga katalanasit.

Për këtë arsye, drejtuesit e Barcelonës dhe trajneri Hansi Flick po kërkojnë ta blindojnë të riun, për të mos humbur një tjetër talent të formuar në akademinë më të famshme të futbollit evropian.