Trukonin ndeshjet në Itali, 5 të arrestuar! Një arbitër “manipulonte” ndeshjet e Serie C

Një hetim i përbashkët mes Karabinierëve dhe Guardias di Finanza ka çuar në arrestimin e pesë personave në Reggio Calabria, të akuzuar për manipulim ndeshjesh dhe lidhje me rrjete bastesh të paligjshme.

Në qendër të skandalit ndodhet një arbitër i pezulluar që vazhdonte të ndikonte rezultatet në këmbim parash.

Pesë persona janë vendosur në arrest shtëpie pas një operacioni të përbashkët mes Karabinierëve të Reggio Calabrias dhe Guardias di Finanza, nën akuzën për asociacion kriminal dhe mashtrim sportiv.

Masat u vendosën nga Gjykata e Reggio Calabrias, pas një hetimi që zbuloi një rrjet të mirë-organizuar për trukimin e ndeshjeve në kategoritë e të rinjve dhe në Serie C.

Hetimet nisën në janar 2024, kur Agjencia e Doganave dhe Monopoleve sinjalizoi një fluks të pazakontë bastesh në një ndeshje të kampionatit Primavera.

Nga verifikimet rezultoi se prapa veprimtarisë fshihej një grup kriminal i udhëhequr nga arbitri Luigi Catanoso, pjesëtar i seksionit AIA të Reggio Calabrias, i cili dyshohet se ka manipuluar disa takime duke ndikuar në penallti dhe kartonë të kuq për të favorizuar bastet e grupit.

Sipas prokurorëve, Catanoso jo vetëm që vazhdoi të vepronte pas pezullimit, por korruptonte kolegët e tij, duke u ofruar deri në 10 mijë euro për ndeshje.

Në skemë ishin përfshirë edhe dy sipërmarrës nga Toscana, baba e bir, pronarë të një agjencie bastesh në Sesto Fiorentino, që financuan blerjen e arbitrave dhe përdorën platforma bastesh jashtë Bashkimit Evropian për të shmangur gjurmimin e fitimeve.

Arbitri Stefano Milone, i cili denoncoi kolegun e korruptuar, tha se “ishte e lehtë të gjeje guximin për të folur” dhe se “ligjshmëria ka fituar”.  Hetimet vijojnë për të identifikuar ndeshje të tjera të trukuara dhe për të gjurmuar rrjedhën ndërkombëtare të parave.