Amorim flet për përvojën

Trajneri i Manchester United, Ruben Amorim, e përshkroi të enjten vitin e tij të parë në klubin e “Old Trafford” si një udhëtim plot ulje e ngritje, por tha se ndjehet i inkurajuar nga fakti që ka qëndruar besnik ndaj parimeve të tij, teksa skuadra më në fund po tregon shenja të qarta përparimi.

Pas kritikave të shumta për formacionet dhe taktikat e tij, United më në fund arriti të fitojë tri ndeshje radhazi për herë të parë nën drejtimin e trajnerit portugez, i cili muajin e ardhshëm mbush një vit në krye të klubit.

“Djajtë e Kuq” aktualisht renditen në vendin e gjashtë në tabelën e Premier League me 16 pikë pas nëntë ndeshjeve, gjashtë pikë më pak se lideri Arsenal dhe një pikë më shumë se kampioni në fuqi, Liverpool.

“Ishte një udhëtim, një udhëtim i madh. Shumë i vështirë. Momente të mira, momente të këqija. Kam mësuar shumë, dhe kjo është gjë shumë e rëndësishme,” tha Amorim para gazetarëve në prag të ndeshjes së së shtunës ndaj Nottingham Forest.

“Mësova që edhe në momentet e mia më të vështira, mund të qëndroj i përkushtuar ndaj gjërave në të cilat besoj, dhe kjo është diçka e mirë që çdo njeri duhet ta kuptojë.

“Sot përgjigjja ime është ndryshe nga ajo e tre javëve më parë, prandaj është e rëndësishme ta kuptosh këtë. Është një nga nderet më të mëdha të jetës sime të jem këtu, dhe dua të vazhdoj këtu për shumë vite.”

Forest drejtohet nga Sean Dyche, trajneri i tretë i klubit këtë sezon dhe një nga kritikët e Amorimit, i cili më herët kishte deklaruar se portugezi do të kishte fituar më shumë ndeshje sikur të përdorte formacionin 4-4-2.

“Gjithmonë them që kam një mënyrë të lojës që kërkon kohë, por më vonë do të jetë më e mirë,” tha Amorim.

“Ne nuk e dimë këtë. Mund ta shoh Sean Dyche si trajner dhe si analist. Nëse je analist dhe nuk thua gjëra të forta, unë s’dua të të shikoj. Jam njësoj si ai. E kuptoj plotësisht që është një punë e ndryshme.

“E di që Sean Dyche është i zgjuar dhe di si të luajë lojën. Ai e kupton se një gjë është të shikosh dhe të flasësh për ndeshjen, dhe një tjetër është ta stërvitësh një skuadër.”

Amorim tha se nuk është i sigurt nëse mbrojtësi i lënduar Harry Maguire do të jetë gati për ndeshjen, ndërsa Lisandro Martinez ende nuk është i gatshëm, edhe pse është kthyer në stërvitje të plotë pas dëmtimit të ligamentit të kryqëzuar që pësoi në shkurt.