Dalin detaje nga biseda mes Alonsos dhe Vinicius në stërvitje

Sulmuesi i Real Madridit, Vinicius Junior, kërkoi publikisht falje të mërkurën ndaj tifozëve, klubit dhe bashkëlojtarëve të tij për shpërthimin që pati pas zëvendësimit gjatë El Clasicos, kur u pa duke dalë me zemërim në tunel dhe duke thënë “Po largohem nga klubi”.

Edhe pse kërkesa për falje kishte për qëllim të qetësonte situatën, fakti që ai nuk e përmendi Xabi Alonson, njeriun ndaj të cilit ishte drejtuar zemërimi i tij, vetëm sa e shtoi spekulimin për marrëdhënien mes tyre.

Një marrëdhënie që, sipas shumë raporteve, praktikisht nuk ekziston.

Braziliani thuhet se ka pasur një përplasje me Alonson që gjatë Kupës së Botës për Klube dhe po konsideron seriozisht largimin nga “Los Blancos” nëse trajneri bask nuk largohet.

U zbulua dje se Vinicius kishte kërkuar falje në qendrën stërvitore të Valdebebas para seancës së planifikuar.

Sipas “El Chiringuito”, presidenti Florentino Perez ishte i pranishëm në kompleks të mërkurën, çka sugjeron se të paktën si Alonso, ashtu edhe Vinicius ishin nën mbikëqyrje.

Ata raportojnë se braziliani mbajti një fjalim të shkurtër, duke kërkuar falje dhe duke shtuar: “Tani të gjithë do të shkojmë në të njëjtin drejtim.”

Më pas, Alonso i është drejtuar skuadrës duke thënë: “Nëse dikush ka ankesa, le t’i shprehë brenda grupit, jo në mënyrë që ta shohë gjithë bota.” Atmosfera gjatë stërvitjes ishte pozitive, dhe madje Vinicius dhe Alonso thuhet se bënë edhe një shaka së bashku pas seancës.

Megjithatë, “Cadena Cope” e paraqet situatën më të tensionuar.

Sipas tyre, mes dyshes ka pasur vetëm “fillimin e një bisede”, por tensionet janë larg zgjidhjes, pasi të dy mbeten shumë të ndarë për mënyrën se si e shohin raportin dhe pritshmëritë ndaj njëri-tjetrit.

Më herët gjatë javës, një raport tjetër bëri të ditur se Alonso ka pasur përplasje edhe me disa nga lojtarët më me përvojë, teksa po përpiqet të zbatojë metodat e tij të reja. Në fushë, Real Madridi ka nisur mirë sezonin, por duket se Alonso tani ka mjaft punë për të menaxhuar edhe jashtë saj.