Përplasja me lojtarin, trajneri i Partizanit kërkon ndjesë

Trajneri i Partizanit U-18, Aldo Duro, ka reaguar menjëherë pas videos së publikuar në rrjet, teksa shfaqet duke shtyrë futbollistin e skuadrës së tij, Antonio Pëllumbi.

Duro ka kërkuar ndjesë publike nëpërmjet një postimi në “Instastory”, teksa e cilëson 17-vjeçarin si një djalë për të.

“Në lidhje me pamjet e shfaqura gjatë ndeshjes së fundit, dua të shpreh publikisht ndjesën time më të sinqertë për gjestin e tepruar ndaj lojtarit tim.

Ishte një moment i nxitur nga emocionet e forta të ndeshjes, pa asnjë qëllim keqdashës apo mungesë respekti ndaj tij.

Ai djalë, ashtu si të gjithë futbollistët e tjerë të ekipit, është për mua si një djalë, një pjesë e familjes sonë sportive me të cilën kemi fituar, kemi humbur dhe kemi kaluar çdo sfidë bashkë. E kuptoj që këto pamje nuk përfaqësojnë as mua personalisht, as frymën e ekipit tonë.

Në ekipin tonë respekti, bashkimi dhe përkushtimi janë mbi gjithçka, dhe do të bëj çmos që situata të tilla të mos përsëriten më.

Faleminderit tifozëve dhe të gjithë atyre që e kuptojnë se futbolli është plot pasion, por mbi të gjitha duhet të mbetet një shembull pozitiv për sportivitetin dhe respektin reciprok. Edhe një herë: ndjesë”., reagon Duro.