Përfaqësuesi i grabitësve të xhevahireve nga muzeu Luvër kontakton kompaninë izraelite

Një kompani sigurie izraelite tha se është kontaktuar nga hajdutët që qëndrojnë pas vjedhjes së bizhuterive nga Luvri, duke ofruar negociata sekrete për të shitur sendet e vjedhura në rrjetin e errët (DarkWeb).

CGI Group pretendon se menaxhmenti i Luvrit e injoroi ofertën, edhe pasi grabitësit dhanë prova të qarta se zotëronin disa nga bizhuteritë e vjedhura dhe se ata kërkuan dhjetëra miliona euro për sendet e vjedhura.

Tzvika Naveh, drejtor ekzekutiv, tha se kompania mori një mesazh të koduar përmes faqes së saj të internetit pesë ditë pas grabitjes së 19 tetorit nga një person që pretendonte se përfaqësonte hajdutët.

"Ai na ofroi negociata në rrjetin e errët për të blerë sende të vjedhura, duke kufizuar kontaktin në vetëm 24 orë. Kompania mori pjesë në një seri bisedash të koduara me përfaqësuesin e grabitësve dhe mori indikacione se ai me të vërtetë zotëronte të paktën disa nga sendet e vjedhura. Ata ishin në arrati dhe duhej të shpëtonin shpejt nga plaçka", tha ai.

Nëpërmjet një ndërmjetësi, ai kontaktoi menaxhmentin e Luvrit, por ky i fundit nuk iu përgjigj ofertës brenda gjashtë ditësh.

"Ne humbëm besueshmërinë te hajdutët dhe Luvri humbi një mundësi të vërtetë për të kthyer bizhuteritë. Fatkeqësisht, egoja dhe hezitimi duket se kanë luajtur një rol," vuri në dukje Naveh.

Ai pretendon se edhe disa muaj më parë, në një intervistë me gazetën italiane Il Tempo, ai paralajmëroi për diskutime në rrjetin e errët që sugjeronin plane për të grabitur Luvrin.

Disa raporte sugjeruan se Grupi CGI ishte i përfshirë në hetimin e grabitjes, por muzeu i njohur francez mohoi çdo kontakt direkt me kompaninë izraelite.

Kompania pretendon se komunikimi kaloi përmes degës së tyre italiane dhe ndoshta u organizua nga një kompani sigurimi e lidhur me muzeun.

Kujtojmë, grabitësit hynë me forcë në një nga dhomat më luksoze të muzeut dhe ikën me xhevahiret e kurorës me vlerë 88 milionë euro. Deri më tani janë arrestuar disa persona, por thesari i vjedhur, përfshirë gjerdanin me diamant smeraldi që Napoleoni i Parë ia dha gruas së tij të dytë Marie Louise, dhe diademën me 212 perla dhe 2 mijë diamante të Perandoreshës Eugenie, nuk është gjetur ende.